Afg‘oniston prezidentining qarindoshi suiqasd natijasida o‘ldirildi

Afg‘oniston prezidenti Hamid Karzayning amakivachchasi xudkush tomonidan amalga oshirilgan teraktda halok bo‘ldi. Bu haqda “RIA Novosti” xabar berdi.

Prezidentning amakivachchasi Hashmat Karzay Qandahor provinsiyasidagi o‘z uyida o‘ldirilgan.

Provinsiya gubernatorining vakili aytishicha, xudkush terrorchi Hashmat Karzayning uyiga uni Ramazon hayiti bilan tabriklash maqsadidagi mehmon sifatida tashrif buyurgan. Uni quchoqlashi bilan portlovchi qurilmani harakatga keltirgan.

Prezident amakivachchasining o‘limi mamlakatda iyun oyi boshidagi prezidentlik saylovlaridan buyon davom etayotgan siyosiy tanglikni chuqurlashtirishi mumkin.

Hashmat Karzay Afg‘onistondagi saylovlar oldidan bo‘lib o‘tgan kampaniyalarda faol ishtirok etgan. U avval prezidentlikka nomzod Qayum Karzay (Hamid Karzayning akasi) shtabida ishlagan. U o‘z nomzodini olib tashlagach, Ashraf G‘ani saylovoldi kampaniyasiga menejerlik qilgan.