Isroil hukumati Falastin hududlarida yana 1500 ta yangi uy quradi
Isroil qurilish vazirligi Falastin hududlaridagi yahudiy qishloqlarida 1500 ta yangi uyni qurish uchun tender e’lon qildi, deya xabar bermoqda Haaretz gazetasi.
Vazir Uri Arielning bayon qilishicha, ushbu qaror Falastinda HAMAS tomonidan qo‘llab-quvvatlanayotgan yangi hukumat shakllantirilganiga Isroilning javobidir.
“Kun”ning qayd etishicha, qurilishi rejalashtirilayotgan uylarning 400 tasi Sharqiy Quddusda, qolganlari esa Iordan daryosining g‘arbiy qirg‘og‘ida qad ko‘taradi.
“Isroil hukumati mamlakatning butun hududi bo‘ylab turar-joy qurish huquqiga va majburiyatiga ega”, — dedi Ariel. Uning qo‘shimcha qilishicha, yangi qurilish dasturi Isroildagi turar-joy narxlarini arzonlashtirishga ham xizmat qiladi.
Falastin hududlarida yahudiy qishloqlarini qurish ishlari 1967-yilgi Olti kunlik urushdan so‘ng, Isroil hukumati ko‘magi bilan boshlangan. BMT ushbu qishloqlarni noqonuniy va xalqaro qonunchilikka zid deb hisoblaydi.
