“Ochiq byudjet” portalida “Tashabbusli byudjet” jarayonining 2024-yildagi 1-mavsumi g‘olib loyihalari e’lon qilingan edi. Qashqadaryo viloyati hokimligining ma’lum qilishicha, viloyat mamlakat bo‘ylab eng ko‘p ovoz to‘plangan hudud bo‘ldi.
Aytilishicha, 2024-yil tashabbusli byudjet loyihasi 1-mavsumida Yakkabog‘ tumani “Qo‘shchinor” mahallasi 14 918 ta ovoz bilan respublikada birinchi bo‘ldi. Shuningdek, respublika bo‘ylab rekord darajadagi eng ko‘p ovoz to‘plangan hudud — Qashqadaryo, jami 1 562,3 mingta (44 foiz) ovoz to‘plandi.
Qashqadaryo viloyatiga 1-mavsumda 253 mlrd so‘m mablag‘ ajratildi, 2188 ta loyihalar saralab olindi, 152 ta mahalla bo‘yicha 183 ta loyiha g‘olib bo‘ldi.
O‘qituvchi va hamshiralar majburlandi, hatto ruhiy bemorlardan ovoz yig‘ildi: galdagi “Tashabbusli byudjet” nimasi bilan yodda qoldi?
“Tashabbusli byudjet”ning 2024-yildagi birinchi mavsumi uchun ovoz berish 16-mart kuni soat 00:00 dan boshlangan bo‘lib, jarayon 4-aprel kuni soat 00:00 da yakunlandi. Navbatdagi ovoz yig‘ish jarayonlari o‘qituvchi va hamshiralarning ovoz to‘plashga majburlanishi, sovrin uchun Gentra, Nexia kabi avtomobillar, o‘nlab qo‘zi va’da qilinishi bilan yodda qoldi.
Respublika bo‘ylab 2 254 ta mahalla bo‘yicha jami 2 770 ta loyiha g‘olib deb topildi. Ushbu loyihalarni moliyalashtirish uchun mahalliy byudjet mablag‘lari hisobidan 3,3 trln so‘m yo‘naltiriladi.
Maʼlumot uchun, ovoz berish jarayonlarida mamlakat bo‘ylab 11,7 million nafar fuqaro ishtirok etdi.
Shu bilan birga, Qiziltepa tumanida fuqarolar majburiy ovoz to‘plashga jalb etilishi holati qayd etilgani sababli majburiy ovoz to‘plangan loyihalarga aniqlik kiritilmoqda, o‘rganish natijalariga ko‘ra, mazkur tuman bo‘yicha g‘olib loyihalar qo‘shimcha ravishda eʼlon qilinadi.
G‘olib loyihalar bilan ushbu havola orqali tanishish mumkin.
Izoh (0)