“Chelsi” 6 nafar futbolchisini sotishga harakat qiladi

Londonning “Chelsi” klubi yozgi transfer oynasi vaqti tarkibini yangilashni faol tarzda davom ettirmoqda. “Aristokratlar” keraksiz futbolchilarni sotish orqali hozirgacha 230 million yevrodan ortiq daromad ko‘rdi va bu jarayon hali ham davom etmoqda.

Taniqli jurnalist Fabritsio Romanoning xabar berishicha, klub rahbariyati faqat Kristofer Nkunku va Nikolas Jekson bilan emas, balki yana to‘rt nafar futbolchiga ham “chiqish eshigini ko‘rsatgan”. Ushbu ro‘yxatdan quyidagilar joy olgan: Renatu Veyga, Ben Chiluel, Rahim Sterling va Aksel Disasi. Mazkur futbolchilar asosiy tarkib ro‘yxatidan chiqarilgan bo‘lib, transfer oynasi yopilguniga qadar jamoani tark etishi kutilmoqda.

Bundan tashqari, “Chelsi” transfer bozorida xaridlar bo‘yicha ham faol harakat qilmoqda. Klub sakkiz nafar yangi futbolchini sotib olib, buning uchun taxminan 280 million yevro sarflagan. Bu ko‘rsatkich bilan “ko‘klar” Yevropa klublari orasida eng faol xaridorlar qatoridan joy olgan.