Nigeriyada so‘nggi kunlarda yog‘gan kuchli yomg‘ir oqibatida yuzaga kelgan toshqin kamida 47 kishining umriga zomin bo‘ldi, 56 mingdan ortiq odam esa boshpanasiz qoldi. Bu haqda mahalliy nashrlarga tayanib, Anadolu xabar berdi.
Rasmiy ma’lumotlarga ko‘ra, toshqin 339 ta mahalla va qishloqdagi 7754 ta xonadonga zarar yetkazgan. 30 kishi uy tomining bosib qolishi oqibatida, yana 17 kishi esa suvda cho‘kib, halok bo‘lgan. Bundan tashqari, 70 kishi jarohatlangan, 257 bosh qoramol nobud bo‘lgan.
“Bir necha daqiqada hamma narsani suv olib ketdi. Endi oilam bilan vaqtincha maktab binosida yashayapmiz. Bizga oziq-ovqat va dori-darmon zarur”, dedi Dosso provinsiyasida yashovchi 45 yoshli Amina Umar.
Boshqa bir jabrlangan, 60 yoshli dehqon Mussa Ibrahim esa shunday dedi:
“Yillar davomida mehnat qilib qurgan uyimdan asar ham qolmadi. Hamma mol-holim suvda oqib ketdi. Biz endi qanday yashashni bilmaymiz”.
Hukumat toshqindan zarar ko‘rganlarga yordam ko‘rsatish uchun 21,3 million dollar ajratganini ma’lum qilgan. Toshqinning oldini olish bo‘yicha milliy qo‘mita esa 3776 oilaga oziq-ovqat tarqatishni boshlagan. Mutaxassislarning ta’kidlashicha, iqlim o‘zgarishi tufayli yog‘ingarchilik ritmining keskin o‘zgarishi Afrikada toshqinni eng xavfli tabiiy ofatlardan biriga aylantirmoqda. Kuchli yomg‘ir 2024-yilda Nigeriyaning 8 ta hududida qariyb 1,5 million kishining hayotiga salbiy ta’sir ko‘rsatgan.
Nigeriya Afrikaning g‘arbiy qismida joylashgan va iqlimi asosan ekvatorial va tropik bo‘lib, hududlarga qarab farqlanadi:
Janubiy qism – ekvatorial iqlim hukm suradi. Bu yerda namlik yuqori, yil bo‘yi issiq va sernam bo‘ladi. Yomg‘ir mavsumi martdan oktyabrgacha davom etadi. O‘rtacha harorat 25–28 °C. Iqlim o‘zgarishi bu yerda dengiz sathi ko‘tarilishi va suv toshqinini kuchaytirmoqda. Ko‘plab qishloqlar suv ostida qolmoqda, infratuzilma zarar ko‘rmoqda. Neft qazib olinadigan delta hududi eng ko‘p zarar ko‘rmoqda.
Markaziy qism – savanna iqlimi. Bu yerda quruq va yomg‘irli mavsumlar aniq ko‘zga tashlanadi. Yomg‘ir aprel-oktyabrda yog‘adi, noyabr–mart oylarida esa quruq harmattan shamoli esadi (quruq va changli shamol). Hozirda yomg‘ir mavsumidagi beqaror tarzdagi yog‘in tufayli qishloq xo‘jaligi izdan chiqmoqda. Bir yili haddan tashqari yomg‘ir yog‘ib, toshqin bo‘lsa, boshqa yili qurg‘oqchilik kuzatiladi.
Shimoliy qism – tropik cho‘l va yarim cho‘l iqlimi. Juda issiq va quruq bo‘lib, ba’zi joylarda yozda harorat 40 °C dan ham oshadi. Yomg‘ir juda kam yog‘adi. Iqlim o‘zgarishi oqibatida bu hududlarda cho‘llanish va qurg‘oqchilik keskin kuchaygan. Yaylovlar qurib, oqibatda chorvachilik va dehqonchilikka katta zarar yetmoqda. Ko‘plab aholi janubga ko‘chib ketishga majbur bo‘lmoqda.
Izoh (0)