O‘ndan ortiq vazirlik va idoralar Yangi Toshkentda vaqtincha tashkil etilgan obyektlarda faoliyat boshlagan. Bu haqda bugun, 20-avgust kuni prezident Shavkat Mirziyoyevga qilingan taqdimotda qayd etilgan.
Prezident matbuot xizmati xabariga ko‘ra, hududda 60 dan ortiq davlat idoralari uchun maʼmuriy binolar barpo etiladi.
Yangi Toshkent qurilishiga 2023-yilda start berilgan. Qurilishlar uchun Yuqori Chirchiq va O‘rta Chirchiq tumanlaridan 19 ming 700 gektar yer ajratilgan. Loyihaning konsepsiyasi Buyuk Britaniyaning “Cross-works” kompaniyasi tomonidan ishlab chiqilgan.
Birinchi bosqichda olti ming gektar maydonda inshootlar qurilib, 600 ming aholi uchun zamonaviy sharoitlar yaratiladi. Loyiha to‘liq yakunlanganida 2 million nafar odam yashaydigan aylanadi.
Hozirgi kunda shaharning yerosti muhandislik tarmoqlari qurilmoqda. Xususan, bir va ikki seksiyali kollektorlar yotqizilyapti. Ular orqali markazlashgan issiqlik va suv quvurlari, elektr energiyasi, telekommunikatsiya kabi barcha muhandislik tarmoqlari yer ostidan o‘tkaziladi. Shuningdek, transportlarning erkin qatnovi uchun tunnellar va yerosti turargohlari quriladi.
“Har bir loyihada zamonaviy yondashuv, mukammal yechim va yashillik eʼtiborga olinmoqda. Xususan, ekologik toza transport tizimi tashkil etiladi. Metro va elektrobuslar harakati muvofiqlashtiriladi. Piyodalar hamda velosipedchilarning to‘siqsiz va xavfsiz harakatlanishi uchun keng qulaylik yaratiladi”, deyiladi manbada.
Xabarga ko‘ra, shaharning yangi qismiga ko‘plab mahalliy va xorijiy investorlar qiziqish bildiryapti. Hozirda auksionda sotilgan 13 ta tijoriy lotlar bo‘yicha 554 million dollarlik investitsiya shartnomalari tuzilgan.
“Hududdagi qurilish jarayonida 160 ming nafar aholining bandligi taʼminlanadi. Kelajakda esa shaharda innovatsion texnologiyaga asoslangan, yuqori daromadli yuz minglab doimiy ish o‘rni bo‘ladi. Buning uchun yangi taʼlim va tibbiyot klasterlari, axborot texnologiyalari xizmatlari va texnoparklar tashkil etiladi”, deyiladi manbada.
Taqdimotda prezident loyihalarga investitsiyalar jalb etish, dam olish joylari va xizmatlarni qulay yo‘lga qo‘yish bo‘yicha tavsiyalar bergan.
Joriy yil iyun oyida Qurilish va uy-joy xo‘jaligi vaziri Sherzod Hidoyatov Yangi Toshkentda vazirliklarning vaqtinchalik binosini qurish ishlari ketayotganini, yaqinda bir necha vazirlik binolari hududga ko‘chirilishini aytgandi. Jumaladan, Energetika vazirligi ko‘chgani, Transport, Qurilish va Ekologiya vazirliklari ham yaqin kunlarda to‘liq ko‘chishi qayd etilgan.
Izoh (0)