Ijtimoiy tarmoqlarda Toshkent viloyati Nurafshon shahridagi xonadonlarning biridan eshak hayvoni terisi va go‘sht mahsulotlari olingani haqida video tarqaldi. Viloyat IIBB matbuot kotibi holat yuzasidan munosabat bildirdi.
Unda aytilishicha, bu holat Oqqo‘rg‘on, Ohangaron tumanlaridagi surishtiruvlar Nurafshon shahrida davom ettirilgani ortidan aniqlangan. Tadbir davomida eshak terilari va go‘sht mahsulotlari daliliy ashyo sifatida olingan.
Tekshiruvlar yakuni bo‘yicha qonuniy qaror qabul qilinishi ta’minlanishi aytildi.
Bundan bir oy oldin Toshkent viloyati IIBB Karantin tadbirlarini tashkil etish bo‘linmasi va hamkorlikdagi tashkilotlar tomonidan aholini xavfsiz oziq-ovqat bilan ta’minlash yo‘nalishida nazorat tadbirlari o‘tkazilgan edi.
Oqqo‘rg‘on tumanida eshak suyaklarining suvga tashlab ketilayotgani holatidan boshlangan tadbir Ohangaron tumanida davom ettirilib, 3 nafar shaxs gumonlanuvchi sifatida ushlangani va tergovga qadar surishtiruv olib borilayotgani haqida xabar berilgan.
Avvalroq tarmoqlarda Surxondaryo viloyatida fuqarolarning eshak so‘ygani aytilgan va hayvonlar jasadi ko‘ringan video tarqalgandi. Viloyat hokimligi axborot xizmati rahbari bu eski video ekanligini bildirgan.
Ma’lumot uchun, eshak terisi va ichagi tibbiyotda subtovar sifatida foydalaniladi. Qonunchilikda eshak go‘shtini iste’mol qilish yoki sotganlik uchun javobgarlik yo‘q. Faqat eshak go‘shtini boshqa hayvon, masalan, mol go‘shti deb sotganlik uchun javobgarlik mavjud.
Izoh (0)