Toshkent viloyati Yuqori Chirchiq tumani hududidan oqib o‘tuvchi Qorasuv daryosi o‘rtasida qolib ketgan bola qutqarildi. Bu haqda FVV matbuot xizmati xabar berdi.
Qayd etilishicha, 10-iyun kuni soat 13:50 da Toshkent viloyati FVBga Yuqori Chirchiq tumani hududidan oqib o‘tuvchi Qorasuv daryosi o‘rtasida bir bola qolib ketgani to‘g‘risida xabar kelib tushgan. Maʼlum bo‘lishicha, daryoga cho‘milish maqsadida borgan bola suzib, holdan toygan va daryo markazidagi orolchaga chiqib olgan. Suv oqimining tezligi yuqori bo‘lgani sababli orqaga qaytishning imkoni bo‘lmay qolgan.
Mazkur holat bo‘yicha Toshkent viloyati FVB qutqaruvchilari zudlik bilan aytilgan manzilga yetib borgan. Olib borilgan tezkor harakatlar natijasida orolchada qolib ketgan bola maxsus anjomlar yordamida sog‘-salomat qirg‘oqqa olib o‘tilgan.
Aprel boshlarida Toshkentning Chilonzor tumanidan oqib o‘tuvchi Bo‘rijar kanalida 3 kishi cho‘kib ketgani to‘g‘risida xabar berilgandi. Yanvar oyi o‘rtalarida esa Sirdaryoda o‘quvchilar bo‘lgan Gentra kanalga tushib ketishi oqibatida egizaklar suvda halok bo‘lgan edi.
Izoh (0)