Sankt Peterburg hukumati muhojirlarga kuryer va taksi haydovchisi bo‘lib ishlashni taqiqlamoqchi. Qaror loyihasi 28-may kuni shahar hukumati saytida e’lon qilindi.
Qonun loyihasiga asosan 1-iyuldan boshlab elektr velosipedlar va samokatlarda kuryerlik qilishga taqiq joriy etilishi mumkin. Patentlar bo‘yicha ishlaydigan migrantlarga quyidagi iqtisodiy faoliyat turlari bo‘yicha ishlashni taqiqlash taklif etilmoqda:
- Yengil avtomobillarni haydovchilik uchun ijaraga berish va taksi xizmati;
- Kuryerlik xizmati;
- Turli transport vositalari orqali yetkazib berish xizmati;
- Uyga oziq-ovqat yetkazib berish faoliyati;
- Boshqa kuryerlik ishlari.
Hujjatga ko‘ra, 1-iyuldan boshlab tovar yetkazib berish sohasida faoliyat yurituvchi kompaniya va tadbirkorlarga talab qo‘yiladi. Jumladan, yetkazib berish reyestrini yuritishdan tortib, piyoda yetkazib beruvchi kuryerlarni ularning joylashuvini aniqlovchi qurilmalar bilan ta’minlashgacha.
Shuningdek, turli transport vositalarida ishlaydigan kuryerlarni ham shu turdagi qurilmalar bilan jihozlash taklif etilmoqda, ularning maksimal tezligi soatiga 15 kilometr bilan cheklanadi.
Majburiy talablar qatoriga “kuryerning kiyimida, transport vositasida va sumkasida har bir kuryer uchun yagona identifikatsiya raqamini joylashtirish” ham kiradi.
Taqiq 1-iyuldan kuchga kirishi kerak va 2025-yil oxirigacha amal qiladi. Qaror kuchga kirgan kundan boshlab uch oy ichida yangi talabni bajarish majburiyati yuklanadi. Mehnat va bandlik qo‘mitasi 2026-yil uchun shunga o‘xshash qoidalarni belgilash bo‘yicha o‘z taklifini taqdim etishi kerak.
Izoh (0)