Марказий банк январь ойи якуни бўйича республикадаги тижорат банкларининг муаммоли кредитлари миқдорини очиқлади. Қайд этилишича, бир ойда қайтарилмаётган қарзлар деярли 2,6 тлрн сўмга кўпайган.
2025 йил 1 февраль ҳолатига кўра, Ўзбекистондаги тижорат банкларининг муаммоли кредитлари (NPL) 23 трлн 768 млрд сўмни ташкил этди. Бир ой аввал, 1 январь куни бу рақам 21 трлн 185 млрд сўм эди.
Муаммоли кредитларнинг катта қисми, яъни 16 трлн 820 млрд сўми давлат улуши мавжуд банкларга тегишли. Қолган 6 трлн 949 млрд сўми хусусий банклар кўраётган зарар ҳисобланади.
Давлат банклари орасида энг кўп қайтарилмаётган кредит қарздорлиги Ўзмиллийбанкда — 3 трлн 778 млрд сўм. Қолганларининг муаммоли кредитлари миқдори қуйидагича:
- Ўзсаноатқурилишбанк — 2 трлн 996 млрд сўм;
- Агробанк — 2 трлн 890 млрд сўм;
- Асака банк — 1 трлн 857 млрд сўм;
- Халқ банки — 1 трлн 252 млрд сўм;
- Бизнесни ривожлантириш банки — 2 трлн 85 млрд сўм;
- Микрокредитбанк — 1 трлн 216 млрд сўм;
- Алоқа банк — 343 млрд сўм;
- Турон банк — 402 млрд сўм.
Хусусий банклар қаторида Ипотека банк муаммоли кредитлари энг юқори даражани қайд этган — 3 трлн 511 млрд сўм. Бошқа хусусий банклардаги кўрсаткичлар қуйидагича:
- Капитал банк — 1 трлн 464 млрд сўм;
- Ҳамкор банк — 326 млрд сўм;
- Ипак йўли банк — 219 млрд сўм;
- Trast банк — 201 млрд сўм.
Маълумот учун, муаммоли кредит (NPL) термини тўлов муддати 90 кундан ўтган ва қайтарилмаётган кредит қарздорлигига нисбатан ишлатилади.
Сўнги тўрт йилда мамлакатда мазкур турдаги қарздорлик улуши сезиларли ўсиб борди. Масалан, 2020 йил якунида мамлакатда муаммоли кредитлар жами 5,8 трлн сўм бўлган. 2021 йил охирига келиб, бу миқдор деярли уч баробарга — 17 трлн сўмгача ошган. Кейинги ўсиш тўлқини 2024 йилга тўғри келган. Ўтган йилнинг 1 январида муддати ўтган кредитлар 16,6 трлн сўм эди. Бир ой ичида мазкур кўрсаткич 20 тлрн сўмгача чиққан, май ойи аввалида эса 23,3 трлн сўмгача ўсган.
Изоҳ (0)