Мадриднинг “Реал” клуби Испания Ла Лигаси 28-тури доирасида “Вильярреал”га қарши майдонга тушди ва 2:1 ҳисобида ғалаба қозонди. Учрашувдан кейинги матбуот анжуманида “қироллик клуби” бош мураббийи Карло Анчелотти жамоаси энди камида 72 соатлик дам олиш вақтисиз майдонга тушмаслигини эълон қилди. Бу ҳақида Marca нашри хабар берди.
Мадрид клуби 12 март куни УЕФА Чемпионлар Лигаси 1/8 финал босқичи доирасида “Атлетико” билан ўйин ўтказди. Орадан атиги уч кун ўтиб, 15 март куни Испания чемпионати навбатдаги турида иштирок этди.
Ўйиндан сўнг Анчелотти бу борада Ла Лигани танқид қилди ва бундай ҳолат такрорланса, жамоа чемпионатга бойкот эълон қилишини айтди.
Бугун 72 соатдан кам вақт дам олиб, навбатдаги учрашувни ўтказдик. Биз бошқа бундай қилмаймиз. Раҳбарият бу борада Лига билан икки марта боғланди, лекин ҳеч қандай ўзгариш бўлмади. Агар талаб қилинган дам олиш вақти берилмаса, “Реал” клуби бошқа Ла Лига баҳсларида майдонга тушмайди, деди италиялик мутахассис.
Ушбу баёнот “Реал” раҳбарияти ва Ла Лига ўртасидаги муносабат кескинлашишига сабаб бўлиши мумкин. Сабаби клуб ўз футболчиларининг жисмоний тайёргарлигини сақлаб қолиш ва жароҳатлардан ҳимоялаш мақсадида қатъий чоралар кўришни режалаштирмоқда.
Маълумот учун, “Реал” 28-турдан кейин 60 очко билан турнир жадвали 1-поғонасидан жой олди. Улардан 2 та кам ўйин ўтказган “Барселона” эса 57 очко билан кейинги ўринни эгаллаб турибди.
Изоҳ (0)