Ўзбекистон президенти Шавкат Мирзиёев 11 март куни давлат ташрифи билан Францияга жўнаб кетди. Бу ҳақда президент матбуот хизмати хабар берди.
11—13 март кунлари бўлиб ўтадиган ташриф давомида Париж шаҳрида олий даражадаги музокара ва тадбирлар, Франциянинг расмий ва ишбилармон доиралари билан қатор учрашувлар ўтказилиши режалаштирилган. Бўлажак мулоқотлар кун тартибидан кўп қиррали Ўзбекистон—Франция муносабатларини янада ривожлантириш ва мустаҳкамлаш масалалари ўрин олган.
Савдо-иқтисодий ва инвестиция-молиявий соҳаларда ўзаро манфаатли ҳамкорликни кенгайтириш, Франциянинг етакчи компания ва корхоналари билан кооперация лойиҳаларини илгари суришга эътибор қаратилади. Саммит якунида ҳукуматлараро ва идоралараро битимлар тўпламини қабул қилиш кўзда тутилган.
Бундан ташқари, давлат раҳбари ЮНЕСКО Бош директори Одри Азуле билан учрашиб, ташкилот Бош конференциясининг 43-сессиясига тайёргарлик кўриш ва уни 2025 йилнинг кузида Самарқандда ўтказишнинг амалий жиҳатларини муҳокама қилади.
Le Figaro нашрининг маълум қилишича, Ўзбекистон президентининг Францияга ташрифи давомида энергетика масалалари муҳокамада асосий ўринни эгаллайди.
Давлат раҳбари Францияга бундан аввал 2018 ва 2022 йилларда ташриф буюрган. Франция раҳбари Эммануэл Макрон Ўзбекистонга расмий ташриф билан 2023 йилда келган.
Изоҳ (0)