Тошкент шаҳрининг Юнусобод туманида жойлашган Тошкент кимё-технология институти қошидаги академик лицей негизида қайтадан мактаб ташкил этиш таклиф қилинмоқда. Бу ҳақда “Газета.уз” хабар берди.
Маълум қилинишича, ушбу таклифни Баҳодир Абдувалиев шаҳар ҳокими Шавкат Умурзоқов билан учрашувда билдирган. 9 апрель куни Шавкат Умурзоқов ташрифи чоғида туман ҳокими Шоштепа ва Акбаробод маҳаллалари инфратузилмаси ва қиёфасини яхшилаш бўйича тақдимот ўтказган.
Тақдимотда Баҳодир Абдувалиев Мега Планет савдо маркази ёнидаги 26,5 гектар майдонда жойлашган Акбаробод маҳалласини ривожлантириш чора-тадбирлари ҳақида гапирган. У ердаги 21 та уйда 3248 нафар аҳоли истиқомат қилади.
Нашрнинг туман ҳокими сўзларига асосан ёзишича, маҳаллага авваллари шу ҳудудда бўлган мактаб зарур. 2007 йилда 960 ўринли мактаб биноси Тошкент кимё-технология институти қошидаги академик лицейга берилган бўлса-да, у атиги 30 фоиз қувват билан ишламоқда. Бинонинг бир қисми мусиқа мактабига айланган.
“Лицейга сектор мудири билан шахсан ўзим ташриф буюрдим. У ерда фақат 30 фоиз ўқув хоналари банд, вилоятлардан келган талабалар таҳсил олишади. Синф хоналарининг 70 фоизи бўш. Шу боис лицей биносини кимё саноати тизимидан Мактабгача ва мактаб таълими вазирлиги балансига қайтариб, ўша ерда яна мактаб ташкил этишни таклиф қиламан. Бу маҳалла учун зарур”, — деган у.
Пойтахт ҳокими Шавкат Умурзоқов бу таклифни кўриб чиқишини таъкидлаб, лицейни кўчириш учун жой ажратиш зарурлигини билдирган.
Туман ҳокимининг маълум қилишича, лицей ҳудудидаги 27,5 сотихли учта бўш ер участкасини (1 гектар учун 65 минг доллар) аукцион орқали сотиш йўли билан 22,5 млрд доллар жалб қилиш кутилмоқда. Гап “ўлик ва фойдаланилмаётган” ҳовуз ҳақида кетмоқда, деди у. Савдодан тушган маблағни маҳаллани ободонлаштириш, мактабни таъмирлашга йўналтириш режалаштирилган.
2024 йилда Акбаробод маҳалласида 9,5 миллиард сўмлик ишлар амалга оширилиши режалаштирилган.
Иқтисодчи Отабек Бакиров мактаблар ҳудудидаги сотиб юборилган ер майдонларини қайтариш ўрнига, қолганиниям сотиш янги тўлқин билан давом этиши мумкинлигини ёзмоқда.
“Тасдиқланганидан кейин маҳаллабай юришни бошлаган пойтахт ҳокимига сотиш мумкин бўлган ер майдонларини презентация қилишни бошлашган. Улар орасида илгари мактаб бўлган ва яна мактабга айлантирилиши кўзланган лицейнинг 27,5 сотихли ер майдони ҳам бор. Эмишки, бу жой ўлик ва фойдаланмаётган бассейн эмиш. Сотишдан тушган пулга маҳаллани ободонлаштириш ва мактабни таъмирлашга ишлатилармиш.
Ҳоким билан учрашувда ҳозир бўлганларнинг ҳеч бири мактаб майдонига тегмайлик, қурсак, ўрнига яна мактаб қурайлик демаган. Лоақал биронтаси туриб ўша сотмоқчи бўлган ер майдонининг пулига камида 500 ўринли янги мактаб биноси қурса бўладику, деб сўрамаган.
Агарда ҳозир шу битта мактаб мисолида ер сотиш бошланса, уни тўхтатиб қолиб бўлмайди. ”Юнусобод тажрибаси“ деган аҳмоқона методичка билан бутун Ўзбекистонга ёйилади. Ҳеч ким сайламаган ҳокимлар ва уларнинг очофат шотирлари мактабларнинг ер майдонларига кўз олайтириб турибди. Доимгидек, ҳеч нарсани ҳал қилмайдиган мактабгача ва мактаб таълими вазирлиги оғзига толқон солиб ўтирипти.
Мактабларнинг бўш ҳудудига фақат таълим жараёнига оид бино ва иншоотлар қурилиши керак. бу бассейн, бу спорт зали, бу кутубхона бўлиши мумкин. Агар чуқур иқтисодий асосланса, давлат хусусий шерикчилик асосида хусусий мактаб қуришни ҳам ўйлаб кўрса бўлади, ундан ортиқ эмас.
Ҳурматли қарор қабул қилувчилар, бюджет тизимидаги мактаблар, шифохоналар, университетлар макони ”хусусийлаштиришдан“ дахлсиз бўлиши ва уларнинг ҳудудини сотиш қонун билан тақиқланиши зарур.
Мактаблардан қўлингизни тортинг, ҳурматсиз ерсотарлар. Ўзбекистон келажагига чанг солманг”, — деб ёзади иқтисодчи.
Изоҳ (0)