АҚШнинг BlackRock инвестиция компаниясидаги инвесторлар Панама канали портларидаги акцияларнинг назорат пакетини сотиб олади. Бу ҳақда The Wall Street Journal хабар берди.
Ҳозирда Балбоа ва Кристобал портлари Гонконгнинг CК Hutchison компанияси томонидан бошқарилади. Панаманинг иккита портини сотиб олиш бўйича битим 22,8 миллиард доллар қийматида баҳоланиб, у бутун дунё бўйлаб яна 40 дан ортиқ портларни ўз ичига олади.
Битимнинг бевосита иштирокчиси бўлган WSJ манбасининг айтишича, Hutchison дастлаб порт бизнесини ўз назоратидан чиқаришга қаратилган уринишларга суд орқали эътироз билдириш имкониятини кўриб чиққан. Бироқ BlackRock компаниясининг таклифи жуда фойдали бўлгани боис компания раҳбари, 96 ёшли Ли Ка-шинг ундан воз кеча олмаган.
Hutchison компанияси Гонконг ва Хитойдаги портларни ўзида сақлаб қолади. Яна бир нечта Панама портлари бошқа компаниялар томонидан бошқарилса-да, Балбоа ва Кристобал энг муҳим портлар ҳисобланади.
Трамп президентликка сайланганидан сўнг, агар Панама каналидан фойдаланишнинг амалдаги шартлари қайта кўриб чиқилмаса, АҚШ Панама каналини ўз назоратига қайтаришни талаб қилиши мумкинлигини айтган. У Америка кемалари учун юқори тарифлар жорий этилагнидан норозилик билдирган. АҚШ канал қурилишида ХХ асрнинг биринчи ярмида иштирок этган, объект 1977 йилда Панамага топширилган ва 1999 йилда тўлиқ мамлакат ҳукумати назоратига ўтган.
Трампнинг таъкидлашича, канал иқтисодиёт ва миллий хавфсизлик учун муҳим аҳамиятга эгалиги сабабли АҚШ учун ҳаётий муҳим миллий бойлик ҳисобланади. Гонконг компаниясининг канал объектлари устидан назорати АҚШда энг кўп ташвиш уйғотган.
Панама президенти Хосе Рауль Мулино Трампга “Панама каналининг ҳар бир метри Панамага тегишли ва шундай бўлиб қолади”, дея жавоб берган эди.
Изоҳ (0)