Бирлашган Миллатлар Ташкилоти Ғарбий ва Марказий Африкада нархларнинг ошиши сабабли, яқин ойларда 55 миллионга яқин одам очарчилик билан курашишга тўғри келиши ҳақида огоҳлантирди.
12 апрель куни Жаҳон озиқ-овқат дастури (WFP), БМТнинг болалар агентлиги UNICEF ва Озиқ-овқат ва қишлоқ хўжалиги ташкилоти (FAO) қўшма баёнотида очарчиликка дучор бўлганлар сони сўнгги беш йил ичида тўрт баравар кўпайганини маълум қилган.
Баёнотга кўра, икки рақамли инфляция ва маҳаллий ишлаб чиқаришнинг турғунлиги каби иқтисодий муаммолар инқирознинг асосий омилига айланган. Хабарда Нигерия, Гана, Серра-Леоне ва Мали энг кўп зарар кўриши қайд этилган.
Маълум бўлишича, асосий дон маҳсулотлари нархи минтақа бўйлаб беш йиллик ўртача кўрсаткичга нисбатан 10 фоиздан 100 фоизга кўтарилишда давом этган.
Ҳаракат қилиш вақти келди. Вазият назоратдан чиқиб кетишига йўл қўймаслик учун барча ҳамкорлар фаоллашиши лозим. Ғарбий Африка келажаги учун кўпроқ сармоя киритишимиз керак, — дейди Маргот Вандервелден, WFP нинг Ғарбий Африка бўйича минтақавий директори вазифасини бажарувчи.
Озиқ-овқат танқислиги болаларга айниқса хавфли таъсир кўрсатган. Агентликларнинг таъкидлашича, олти ойдан 23 ойгача бўлган ҳар 10 боладан саккизтаси ўсиш ва ривожланиш учун зарурий миқдорда озиқ-овқат истеъмол қилмайди.
Шунингдек, беш ёшгача бўлган қарийб 16,7 миллион бола тўйиб овқатланмайди ва ҳар уч оиладан иккитаси соғлом овқатланиш имкониятига эга эмас.
Изоҳ (0)