Солиқ қўмитаси Ўзбекистонда фаолият юритаётган расмий таксичилар сони ва уларнинг қанча даромад олганини маълум қилди.
Унга кўра, республика бўйича йўловчи ташиш фаолияти билан шуғулланувчи субъектлар сони 457 764 нафарни ташкил қилди. Шундан ўзини ўзи банд қилганлар сони 457 313 кишини ташкил қилади.
Уларнинг
- 99,2 фоизи — 453 833 нафари эркаклар
- 0,8 фоизи — 3 480 нафари аёллар.
Бу ҳайдовчиларнинг:
- 56,3 фоизи 30−50 ёшда (257 минг 629 киши);
- 36,3 фоизи 30 ёшгача (166 минг 207) киши;
- 7,3 фоизи 50 ёшдан катта (33 минг 477 киши).
2025 йилнинг 7 ойи мобайнида 215 та такси агрегатори солиқ органлари ахборот тизимлари билан интеграция қилинган бўлиб, ушбу кўрсаткич ўтган йилга қараганда 60 тага юқори.
Январь июль ойларида 262,2 миллион марта йўловчи ташиш амалга оширилган. Такси бозори айланмаси эса 5 триллион сўмдан ошган. Шундан 3,6 триллион сўми ёки 72,2 фоиз қисмини нақд тўловлар ташкил этган. Нақдсиз пул ўтказмалари эса 1,4 триллион сўмга етди. Шунингдек, ўртача битта чек нархи 19 077 сўм бўлиб, ўтган йилги нархлардан 621 сўмга қимматлашган.
7 ой давомида такси хизматини кўрсатган 1,8 минг нафар ҳайдовчи 100 млн сўмдан ортиқ даромад олди (2024 йилда уларнинг сони 4,7 минг нафар эди):
- 1 млн сўмгача — 140 276 нафар ҳайдовчи;
- 1−5 млн сўм — 122 834 нафар ҳайдовчи;
- 5−10 млн сўм — 59 407 нафар ҳайдовчи;
- 10−50 млн сўм — 113 744 нафар ҳайдовчи;
- 50−100 млн сўм — 19 186 нафар ҳайдовчи;
- 100 млн сўмдан кўп — 1 836 нафар ҳайдовчи.
Йўловчи ташишда энг кўп хизмат қилаётган автомобиль Cobalt бўлди. Ундан кейин Nexia ва Lacetti турибди. Электромобильлар эса ушбу хизматдаги автомобилларнинг 1,8 фоизини ташкил этади.
2025 йилнинг февралда қабул қилинган президент қарори билан енгил автомобилларда йўловчиларни шаҳар, шаҳар атрофи ва шаҳарлараро ташиш ўзини ўзи банд қилган фуқаролар шуғулланиши мумкин бўлган фаолият турлари рўйхатига киритилди. Уларнинг 100 миллион сўмгача даромадларига солиқ ҳисобланмайди. Йил тугаши билан янги йил бошидан даромадлар қайтадан ҳисобланади.
Ўзини ўзи банд қилган такси ҳайдовчиларининг йиллик даромадлари 100 миллион сўмдан ошганда, улар тўлаши лозим бўлган солиқлар солиқ органларининг хабарномаси асосида юридик шахслар (солиқ агенти) яъни агрегаторлар томонидан тўлов манбайида ушлаб қолинади.
Масалан, ҳайдовчи қайсидир компания томонидан ишлаб чиқилган тизимга уланиб, одам ташиш билан шуғулланмоқда. Унинг даромади йил давомида 100 млн сўмдан ошса, белгиланган тартибда солиқ тўлаши керак. Солиқни тўлаш учун ҳисоб-китобни тўғри қилиш керак, ҳисоботларни Солиқ идорасига юбориш керак. Мана шу ишларни энди ҳайдовчи қилмайди, унинг ўрнига тизимни ишлаб чиққан ва фойдаланиш учун ҳайдовчига очиб берган компания бажаради.
Изоҳ (0)