Ижтимоий тармоқларда “Айрим дача эгалари ўз канализация тизимларини бевосита Чорвоқ сув омборига йўналтирган” мазмунидаги хабарлар тарқалди. Тошкент вилояти Экология бошқармаси бунга муносабат билдирди.
Қайд этилишича, ҳолат бошқарманинг Бўстонлиқ туман бўлими томонидан жойига чиқиб ўрганилди. Ўрганиш давомида Бўстонлиқ тумани “Бурчмулло” МФЙ Чорвоқ сув омбори ҳудудига ушбу ҳудудда яшовчи аҳоли томонидан хўжалик томорқани суғорилган ва ёмғир сувларини чиқиб кетиши учун ариқлар ковланиб, унга полиэтилин қувурлар қўйилиб сувлар ўтказиб юборилгани аниқланди.
Ҳолат бўйича ушбу ҳудудга масъул бўлган Чорвоқ сув омбори ходимига нисбатан Маъмурий жавобгарлик тўғрисидаги кодекснинг 82-моддаси (муҳофаза этиладиган табиий ҳудудларнинг режимини бузиш) 2-қисмига асосан маъмурий баённома расмийлаштирилди ва БҲМнинг 10 баробари — 4 миллион 120 минг сўм миқдорида жарима чораси қўлланилди. Ковланган ариқлар ва унга қўйиб чиқилган қувурлар олиб ташланиб бартараф этилди.
Ижтимоий тармоқларда тарқалган суратлардан бу ягона ҳолат эмаслигини кўриш мумкин. “Чорвоққа нималар оқяпти? Нега сув бўйи сариқ?”, дея савол берган тармоқ фойдаланувчиларидан бири. Тошкент вилояти Экология бошқармаси хабарида бошқа ҳолатлар ҳақида маълумот берилмади.
Маъмурий жавобгарлик тўғрисидаги кодексга кўра, мажмуа (ландшафт) буюртма қўриқхоналари, табиат боғлари, давлат табиат ёдгорликлари, айрим табиий объектлар ҳамда мажмуаларни сақлаб қолиш, такрор кўпайтириш ва тиклаш учун мўлжалланган ҳудудлар, муҳофаза этиладиган ландшафтлар шу жумладан сувни муҳофаза қилиш зоналари, соҳил бўйи минтақалари, айрим табиий ресурсларни бошқариш учун мўлжалланган ҳудудлар, давлат биосфера резерватлари ҳамда давлатлараро муҳофаза этиладиган табиий ҳудудлар режимини бузиш фуқароларга БҲМнинг 10 бараваридан 15 бараваригача, мансабдор шахсларга эса 15 бараваридан 20 бараваригача миқдорда жарима солишга сабаб бўлади.
Изоҳ (0)