Москва суди гипертовушли қурол технологияси устида ишлаган физик Александр Шиплюкни давлатга хиёнат қилишда айблаб, 15 йилга ҳукм қилди. Бу ҳақда “ТАСС” хабар берди.
Шиплюк Россия Фанлар академияси Назарий ва амалий механика институти директори ҳисобланади. У ҳарбий технология устида ишлаган жамоасининг жиноий жавобгарликка тортилган энг сўнгги аъзосидир. Олим 500 минг рубль (салкам 5700 доллар) миқдорида жаримага ҳам тортилган ва унга қўшимча равишда 1,5 йил озодликни чеклаш жазоси тайинланган.
Шиплюкнинг тадқиқотлари тўғридан тўғри оқимли ҳаво-реактив двигателли гипертовушли парвоз қурилмаларининг тажрибавий аэротермодинамикаси билан боғлиқ, у “Гипертовуш технологиялари” лабораториясига раҳбарлик қилган.
57 ёшли олим, физика-математика фанлари доктори Александр Шиплюк 2022 йил 5 август куни ҳибсга олинган. 2017 йилда Хитойда бўлиб ўтган илмий конференцияда гипертовуш соҳасидаги махфий маълумотларни тарқатишда айбланган. Олим айбига иқрор бўлмаган ва у эълон қилган маълумотлар очиқ эканини айтган.
Ҳукм ҳали қонуний кучга кирмаган бўлиб, апелляция инстанциясига шикоят қилиниши мумкин. Шиплюкнинг ҳамкасби, 78 ёшли Анатолий Маслов май ойида “давлатга хиёнат қилганлик” учун 14 йилга қамалганди. Маслов ва Шиплюк билан таниш бўлган иккита америкалик олим ҳибсга олинган россияликлар гипертовушли ракета яратиш учун зарур бўлган ишлар билан шуғулланганини айтган.
Изоҳ (0)