Шаҳрисабз маҳаллий аэропорти 11 сентябрь куни фуқаро авиациясининг парвозлари учун ўз фаолиятини тиклади. Бу ҳақда Uzbekistan Airports хабар берди.
![](/static/2024/09/11/12-1nrroAwO.jpg)
Маълум қилинишича, Silk Avia авиакомпаниясининг Тошкентдан илк парвози маҳаллий вақт билан соат 13:10 да аэропортга бориб қўнди. Парвоз вақти 1 соат 30 дақиқани ташкил этди.
Л410 русумли самолёт сув аркаси билан, биринчи йўловчилар эса карнай-сурнай садолари остида тантанали равишда кутиб олинди. Аэропортга парвозлар деярли 21 йилдан сўнг қайта йўлга қўйилган. Шаҳрисабз аэропорти 2003 йилнинг ноябрь ойида ёпилган эди.
Шаҳрисабздан 5 км жануби-ғарбда қурилган мазкур аэропорт 1983 йилда очилган. 1983-1996 йилларда Тошкент-Шаҳрисабз йўналиши бўйича парвозлар ёз ойларида ҳафтасига 4 марта, куз-қиш мавсумида эса 3 марта амалга оширилган, шунингдек, Урганч-Шаҳрисабз йўналиши бўйича ҳам самолётлар ҳафтасига икки марта парвоз қилган. 1993-1995 - йилларда Тошкент – Қарши – Шаҳрисабз йўналишида парвозлар амалга оширилган. Ҳаво қатновлари Ан-2, Ан-24, Як-40, РЖ-85 русумли самолётларда амалга оширилган.
![](/static/2024/09/11/13-tTTfqUFj.jpg)
Айни пайтда аэропорт фуқаро авиацияси парвозларига хизмат кўрсатиш имкониятига эга. Узунлиги 1554 м ва эни 35 м бўлган учиш-қўниш йўлагидан, иккита самолёт ва тўртта вертолёт туриш жойига эга аэродром қуйидаги турдаги самолётларни сиғдира олади: АТР-42, АТР-72, Л-410 ва барча турдаги вертолётлар. Аэропорт мажмуаси соатига 100 йўловчига хизмат кўрсатиш имкониятига эга.
ЎзА хабарига кўра, парвозлар 11 сентябрдан бошлаб чоршанба ва шанба кунлари қуйидаги жадвалга мувофиқ амалга оширилади:
- Тошкентдан жўнаб кетиш соат –11:40, Шаҳрисабзга етиб бориш соат –13:10
- Шаҳрисабздан жўнаб кетиш соат –13:50, Тошкентга етиб бориш соат –15:50.
Изоҳ (0)