Россия ҳарбийлари томонидан Украинага қарши қўлланаётган Shahed-136 дронларида Ҳиндистонда ишлаб чиқарилган қисмлар топилди. Бу ҳақда Украина президенти офиси раҳбари Андрей Ермак маълум қилди.
Текширувга кўра, дроннинг қувват блокида Ҳиндистонда йиғилган, халқаро Vishay Intertechnology компанияси ишлаб чиқарган кўприк тўғрилагич модули ўрнатилган. Сунъий йўлдош навигацияси антеннасида эса Ҳиндистондаги Aura Semiconductor компаниясининг чипи қўлланган. Украина бу масала бўйича камида икки марта Ҳиндистон Ташқи ишлар вазирлигига мурожаат қилган.
Ҳиндистон ТИВ матбуот котиби Рандҳир Жайсвал мамлакат икки мақсадли товарларни фақат халқаро мажбуриятлар ва ички қонунларга тўлиқ риоя қилинганини тасдиқловчи текширувдан сўнг экспорт қилишини айтди.
Aura Semiconductor ҳаммуассиси Кишоре Ганти эса компания экспорт назорати қоидаларига тўлиқ амал қилишини таъкидлади. Шунингдек, компонентлар компания рухсатисиз “учинчи шахслар орқали” ҳарбий маҳсулот ишлаб чиқарувчиларга етиб бориши мумкинлигини тан олди.
“Биз бундай фаолиятга қатъиян қаршимиз ва қоидабузарлик аниқланса чора кўрамиз”, — деди у.
У товарлар Украинага қарши урушда ишлатилганидан хабар топгач, компания якуний харидор ким эканини аниқлаш учун аудит ўтказгани, бироқ аниқ жавоб олишнинг имкони бўлмаганини айтди.
Россия 2022 йил охиридан бери Shahed 136 камикадзе дронларидан, жумладан, фронтдан ташқаридаги шаҳарларга зарба бериш учун фойдаланмоқда. Украина Хавфсизлик хизмати маълумотларига кўра, Эрон дастлаб Москвага 2000 та шундай дрон етказиб берган. Кейинчалик уларни тўғридан тўғри Россияда йиғиш учун завод ишга тушган. Украина Қуролли кучларининг ҳисоб-китобларига кўра, июль ойининг ўзида Россия Украинага 6297 та шундай дрон учирган.
Изоҳ (0)