АҚШ президенти Дональд Трамп вафотидан сўнг жаннатга тушишни истаётганини ва бунга Украинадаги можарони бартараф этиш бўйича уринишлари ёрдам беришига умид қилаётганини маълум қилди. Бу ҳақда у Fox News телеканалига берган интервьюсида гапирди.
“Мен бу Украинадаги можаро тугашини хоҳлайман. У ерда америкалик аскарлар эмас, асосан руслар ва украинлар ҳалок бўлмоқда. Агар мен ҳар ҳафта 7 минг кишининг ўлдирилишини тўхтата олсам, бу ажойиб бўларди деб ўйлайман”, деди.
Трамп жаннатга тушишга умид қилаётганини таъкидлаган, аммо унинг сўзларига кўра, “жаннатдан жой олишни яхши уддалай олмаяпти”.
“Лекин агар мен барибир жаннатга туша олсам, бу Украинадаги можарони ҳал қилиш сабаблардан бири бўлади”, деди АҚШ президенти.
Шунингдек, Трамп Ҳиндистон ва Покистон ўртасидаги можарода қон тўкилишини тўхтатишга эришганини ҳам қўшимча қилган.
“Ҳиндистон ва Покистон билан боғлиқ вазиятда кўплаб одамлар ҳаётини сақлаб қолганман деб ўйлайман. Улар аллақачон урушга тайёрланишган, самолётларни уриб туширишган эди. Агар мен бунга йўл қўйганимда, бу ядро урушига айланиши мумкин эди. Мен икки томон билан ҳам музокаралар олиб бордим ва уларга, токи жанглар давом этар экан, токи сулҳ тузилмас экан, улар билан савдо битимлари тузмаслигимни айтдим. Мен улар билан алоқага чиқдим ва тинчликка эришдим”, деди Трамп.
Сўнгги пайтларда Трамп тинчлик бўйича Нобель мукофотини олиш истагини очиқчасига билдирмоқда. Бир ҳафта олдин Оқ уй унинг номзодини етти давлат - Озарбайжон, Арманистон, Габон, Исроил, Камбоджа, Руанда ва Покистон томонидан илгари сурилганини маълум қилган эди.
Изоҳ (0)