Туркиянинг Pegasus авиакомпанияси самолёт бортига повербанк — телефон қувватлагични олиб чиқишни тақиқлади. Бунга Қозоғистонда юз берган воқеа сабаб бўлган. Бу ҳақда “Нур.кз” хабар берди.
Маълум қилинишича, Туркиядан Жанубий Кореяга парвоз қилаётган самолёт Қозоғистондан ортга қайтишга мажбур бўлган. Бунга йўловчининг повербанки ўриндиқлар орасига тушиб кетгани сабаб бўлган. Қурилмани йўловчининг ўзи ҳам, стюардессалар ҳам ололмаган. Шундан сўнг самолёт учувчиси эҳтиёткорлик чораси сифатида Истанбулга қайтишга қарор қилган.
Воқеадан сўнг Туркия транспорт ва инфратузилма вазири Абдулқодир Уралўғли барча авиакомпанияларга бортда повербанклардан фойдаланишни тақиқлаш бўйича кўрсатма берган. Вазир бу каби ҳолатлар хавфсизликка таҳдид солиши мумкинлигини таъкидлаган. Шундан сўнг Pegasus авиакомпанияси рейсларда повербанклардан фойдаланишни ва уларни қўл юки таркибида олиб чиқишни расман тақиқлаган. Авиакомпаниянинг баёнотида шундай дейилади:
“Йўловчиларга самолёт бортида повербанклардан фойдаланиш қатъиян ман этилади”.
Бундан олдинроқ Turkish Airlines ҳам хавфсизлик чораларини кучайтириб, ақлли (смарт) чемоданларни — яъни ичида литум батареяси бўлган юкларни самолётга олиб чиқишни тақиқлаган эди. Уларни қўл юки таркибида ҳам, багаж сифатида ҳам самолётга олиб чиқиш мумкин эмас.
Бундан аввалроқ Туркия авиакомпаниялари самолёт тўлиқ қўнганидан кейин хавфсизлик камари белгилари ўчмасдан ўрнидан турган йўловчиларга жарима қўллаш тартибини жорий этган эди. Қоидани бузганларга 70 доллар миқдорида жарима белгиланган.
Изоҳ (0)