Turkiyaning Pegasus aviakompaniyasi samolyot bortiga poverbank — telefon quvvatlagichni olib chiqishni taqiqladi. Bunga Qozog‘istonda yuz bergan voqea sabab bo‘lgan. Bu haqda “Nur.kz” xabar berdi.
Ma’lum qilinishicha, Turkiyadan Janubiy Koreyaga parvoz qilayotgan samolyot Qozog‘istondan ortga qaytishga majbur bo‘lgan. Bunga yo‘lovchining poverbanki o‘rindiqlar orasiga tushib ketgani sabab bo‘lgan. Qurilmani yo‘lovchining o‘zi ham, styuardessalar ham ololmagan. Shundan so‘ng samolyot uchuvchisi ehtiyotkorlik chorasi sifatida Istanbulga qaytishga qaror qilgan.
Voqeadan so‘ng Turkiya transport va infratuzilma vaziri Abdulqodir Uralo‘g‘li barcha aviakompaniyalarga bortda poverbanklardan foydalanishni taqiqlash bo‘yicha ko‘rsatma bergan. Vazir bu kabi holatlar xavfsizlikka tahdid solishi mumkinligini ta’kidlagan. Shundan so‘ng Pegasus aviakompaniyasi reyslarda poverbanklardan foydalanishni va ularni qo‘l yuki tarkibida olib chiqishni rasman taqiqlagan. Aviakompaniyaning bayonotida shunday deyiladi:
“Yo‘lovchilarga samolyot bortida poverbanklardan foydalanish qat’iyan man etiladi”.
Bundan oldinroq Turkish Airlines ham xavfsizlik choralarini kuchaytirib, aqlli (smart) chemodanlarni — ya’ni ichida litum batareyasi bo‘lgan yuklarni samolyotga olib chiqishni taqiqlagan edi. Ularni qo‘l yuki tarkibida ham, bagaj sifatida ham samolyotga olib chiqish mumkin emas.
Bundan avvalroq Turkiya aviakompaniyalari samolyot to‘liq qo‘nganidan keyin xavfsizlik kamari belgilari o‘chmasdan o‘rnidan turgan yo‘lovchilarga jarima qo‘llash tartibini joriy etgan edi. Qoidani buzganlarga 70 dollar miqdorida jarima belgilangan.
Izoh (0)