Жорий йил II чорагида Ўзбекистонда даромадлари камайишини кутаётганлар улуши ўтган йил мос даврига нисбатан ортди. Бу ҳақда Марказий банк тақдим этган Истеъмол кайфияти шарҳида келтирилган.
Сўров натижасида аниқланишича, келгуси 12 ойда аҳолининг 65,4 фоизи даромадлари кўпайишини, 11,7 фоизи эса камайишини, 22,9 фоизи ўзгармаслигини кутмоқда.
“2024 йил мос даврига нисбатан даромадлари ошишини кутаётганлар ва даромадлари камайишини таъкидлаганлар улуши мос равишда 1,7 ва 1,8 фоиз бандга ортган”, дейилади манбада.
2025 йил II чорагида ўтган чоракка нисбатан келгусида даромадлари ошишини кутаётганлар улуши аҳолининг айрим қатламларида бир оз пасайган. Ойига 5 миллион сўмгача, 7-10 миллион сўм ва 15-20 миллион сўм даромад топадиганлар шулар жумласидан. Қолган гуруҳларда (5-7 миллион сўм, 10-15 миллион сўм ва 20 миллион сўмдан юқори) даромадларининг ошишини кутганлар улуши ортган.
Даромад манбалари бўйича респондентларнинг 68 фоизи (2025 йилнинг I чорагида 59 фоиз) расмий иш ҳақидан даромад олишини билдирган.
Ўтган чоракка нисбатан мулк ижарасидан даромад олувчилар улуши ортган. Томорқа ва ёлланма ишлардан, кунлик иш ҳамда стипендия ва нафақалардан даромад олувчилар камайган.
Тадбиркорлик ва савдо, пул ўтказмалари ҳамда дивиденд орқали даромад олувчилар улуши аввалги даврдаги даражасида қолган.
“Келгусидаги даромадлар бўйича кутилмалар соҳалар кесимида турлича шаклланмоқда. Айниқса, кафе-ресторан, ташиш хизмати, қурилиш, қишлоқ хўжалиги, ишлаб чиқариш, давлат бошқаруви, туризм ва фан-таълим соҳаларида фаолият юритувчи респондентларнинг 70 фоиздан ортиғи келгусида даромадлари ўсишини кутмоқда”, дея қайд этган Марказий банк.
Ахборот технологиялари ва оммавий ахборот воситалари, коммунал хизматлар, тиббиёт, маиший хизмат ва савдо соҳаларидаги респондентларнинг 60 фоиздан кўпи келгусида даромадлари ошишини кутмоқда.
Марказий банк мамлакатдаги аксар корхоналар тўлиқ қувватда ишлашига газ ва электр узилишлари тўсиқ бўлаётганини билдирганди.
Изоҳ (0)