Швейцария Россия президенти Владимир Путинга Украина етакчиси Владимир Зеленский билан тинчлик музокараларини ўтказиш учун мамлакатга келса, Халқаро жиноий суднинг ордерига қарамай, уни ҳибсга олмайди. Бу ҳақда Швейцария ташқи ишлар вазири Иняцио Кассис баёнот берди.
Ташқи ишлар вазирининг аниқлик киритишича, маълум шароитларда Путинга Швейцарияга ташриф буюришга рухсат берилади. Сабаби, 2024 йилда Швейцария ҳукумати халқаро қамоққа олиш ордери остида бўлган шахсларга иммунитет бериш қоидаларини белгилаган эди. Яъни қамоққа олиниши керак бўлган одам тинчлик музокаралари учун келган бўлса, унга иммунитет берилади.
2023 йил март ойида Халқаро жиноий суд Владимир Путин ва болалар омбудсмани Мария Лвова-Беловага қарши ҳибсга олиш ордери чиқарган эди. Швейцария ХЖСнинг тўлақонли аъзосидир. 2024 йил июнь ойи бошида мамлакат ҳукумати Халқаро жиноий суд Исроил ҳукуматини Ғазо секторида геноцид уюштирганликда айблаб ордер чиқарган тақдирда ҳам ўз мажбуриятларини бажаришга тайёр эканини алоҳида таъкидлаган эди.
18 август куни Дональд Трамп Оқ уйда Владимир Зеленский ва европалик етакчилар билан Россия–Украина урушини якунлаш бўйича музокаралар ўтказди. Трамп музокаралар давомида Россия президенти билан телефон орқали суҳбатлашди. Шундан сўнг Владимир Путин ҳамда Владимир Зеленский ўртасида шахсий учрашув бўлиши ҳақида келишилганини эълон қилди. АҚШ давлат котиби Марко Рубио Трампнинг Путин билан суҳбатида иштирок этганини ва Россия президентининг учрашувга рози бўлганини тасдиқлади. Бироқ Кремль бу ҳақда расмий равишда хабар бермаган.
Франция президенти Эммануэл Макрон Путин ва Зеленский учрашуви учун Женевани таклиф қилган. Ғарб нашрлари Будапешт ва Римни ҳам вариантлар қаторида тилга олмоқда.
Изоҳ (0)