АҚШ Канада, Хитой ва Мексикадан келтирилаётган товарларга божхона тўловларини жорий этади. Президент Дональд Трамп тегишли фармонни 1 февраль куни имзолади. Бунга жавобан Хитой АҚШни савдо уруши бошланишидан огоҳлантирди.
АҚШга қўшни бўлган Канада ва Мексика маҳсулотлари учун бож 25 фоизгача, Канададан олиб келинадиган хом нефть учун эса 10 фоиз миқдорида белгиланди. Худди шундай — ўн фоизлик ставка Хитойдан келтирилаётган товарларга ҳам қўлланилади.
Трамп ўз қарорини ноқонуний мигрантлар ва гиёҳванд моддалар контрабандаси таҳдиди билан изоҳлади.
“Биз америкаликларни ҳимоя қилишимиз керак, менинг президент сифатидаги вазифам эса — ҳамманинг хавфсизлигини таъминлаш”, деб ёзди у Truth Social ижтимоий тармоғида.
Шу пайтгача АҚШ, Канада ва Мексика ўртасидаги товар савдосида деярли ҳеч қандай қўшимча божлар мавжуд эмасди. Чунки Вашингтон, Оттава ва Мексика USMCА эркин савдо битимини имзолаганди. Трампнинг ўзи бу ҳужжатга Оқ уйдаги биринчи муддати давомида имзо чеккан.
Эҳтимолий савдо уруши
АҚШ Хитойдан импорт божларини яна бир бор оширгач, Пекин Вашингтонни савдо уруши хавфи ҳақида огоҳлантирди. Хитой Ташқи ишлар вазирлиги баёнотида “савдо ёки божхона урушида” ғолиблар бўлмаслиги таъкидланган.
“Қўшимча 10 фоиз миқдоридаги божлар мамлакатлар ўртасидаги наркотрафикка қарши курашда икки томонлама ҳамкорликка таъсир қилиши ва унга зарар етказиши муқаррар”, дейилади вазирлик хабарида.
Хитой “янги божларни қатъиян рад этиши” ва “ўз ҳуқуқ ва манфаатларини қатъий ҳимоя қилиши учун “тегишли жавоб чораларини кўриши”ни таъкидлади.
АҚШ устидан ЖСТга шикоят
Бундан ташқари, Хитой Жаҳон савдо ташкилотига (ЖСТ) АҚШга қарши шикоят қилиш ниятида. Пекиннинг фикрича, АҚШ томонидан божларнинг бир томонлама киритилиши ЖСТ қоидаларини қўпол равишда бузиш ҳисобланади.
Хитой баёнотида бундай чоралар “АҚШга нафақат ички муаммоларини ҳал қилишга ёрдам бермаслиги, балки нормал иқтисодий ва савдо ҳамкорлигига путур етказиши” таъкидланган. Хитой ҳукумати Вашингтонни “ўз сиёсатини қайта кўриб чиқишга“ чақирган.
Трампнинг айблови
Президент Канада, Мексика ва Хитойни ўлимга олиб келувчи фентанил гиёҳванд моддасини АҚШга контрабанда йўли билан етказиб беришга қарши етарлича курашмаётганликда айблади. Қўшма Штатларда ҳар йили 75 000 га яқин одам фентанил дозаси ошиб кетишидан вафот этади. Ушбу опиоид моддаси кўпинча Мексикада Хитойдан келтирилган кимёвий компонентлардан ишлаб чиқарилади ва кейин ноқонуний равишда АҚШга олиб кирилади.
Изоҳ (0)