AQSH Kanada, Xitoy va Meksikadan keltirilayotgan tovarlarga bojxona to‘lovlarini joriy etadi. Prezident Donald Tramp tegishli farmonni 1-fevral kuni imzoladi. Bunga javoban Xitoy AQSHni savdo urushi boshlanishidan ogohlantirdi.
AQSHga qo‘shni bo‘lgan Kanada va Meksika mahsulotlari uchun boj 25 foizgacha, Kanadadan olib kelinadigan xom neft uchun esa 10 foiz miqdorida belgilandi. Xuddi shunday — o‘n foizlik stavka Xitoydan keltirilayotgan tovarlarga ham qo‘llaniladi.
Tramp o‘z qarorini noqonuniy migrantlar va giyohvand moddalar kontrabandasi tahdidi bilan izohladi.
“Biz amerikaliklarni himoya qilishimiz kerak, mening prezident sifatidagi vazifam esa — hammaning xavfsizligini ta’minlash”, deb yozdi u Truth Social ijtimoiy tarmog‘ida.
Shu paytgacha AQSH, Kanada va Meksika o‘rtasidagi tovar savdosida deyarli hech qanday qo‘shimcha bojlar mavjud emasdi. Chunki Vashington, Ottava va Meksika USMCA erkin savdo bitimini imzolagandi. Trampning o‘zi bu hujjatga Oq uydagi birinchi muddati davomida imzo chekkan.
Ehtimoliy savdo urushi
AQSH Xitoydan import bojlarini yana bir bor oshirgach, Pekin Vashingtonni savdo urushi xavfi haqida ogohlantirdi. Xitoy Tashqi ishlar vazirligi bayonotida “savdo yoki bojxona urushida” g‘oliblar bo‘lmasligi ta’kidlangan.
“Qo‘shimcha 10 foiz miqdoridagi bojlar mamlakatlar o‘rtasidagi narkotrafikka qarshi kurashda ikki tomonlama hamkorlikka ta’sir qilishi va unga zarar yetkazishi muqarrar”, deyiladi vazirlik xabarida.
Xitoy “yangi bojlarni qat’iyan rad etishi” va “o‘z huquq va manfaatlarini qat’iy himoya qilishi uchun “tegishli javob choralarini ko‘rishi”ni ta‘kidladi.
AQSH ustidan JSTga shikoyat
Bundan tashqari, Xitoy Jahon savdo tashkilotiga (JST) AQSHga qarshi shikoyat qilish niyatida. Pekinning fikricha, AQSH tomonidan bojlarning bir tomonlama kiritilishi JST qoidalarini qo‘pol ravishda buzish hisoblanadi.
Xitoy bayonotida bunday choralar “AQSHga nafaqat ichki muammolarini hal qilishga yordam bermasligi, balki normal iqtisodiy va savdo hamkorligiga putur yetkazishi” ta’kidlangan. Xitoy hukumati Vashingtonni “o‘z siyosatini qayta ko‘rib chiqishga“ chaqirgan.
Trampning ayblovi
Prezident Kanada, Meksika va Xitoyni o‘limga olib keluvchi fentanil giyohvand moddasini AQSHga kontrabanda yo‘li bilan yetkazib berishga qarshi yetarlicha kurashmayotganlikda aybladi. Qo‘shma Shtatlarda har yili 75 000 ga yaqin odam fentanil dozasi oshib ketishidan vafot etadi. Ushbu opioid moddasi ko‘pincha Meksikada Xitoydan keltirilgan kimyoviy komponentlardan ishlab chiqariladi va keyin noqonuniy ravishda AQSHga olib kiriladi.
Izoh (0)