Президент қарори билан Ёшлар ишлари агентлиги зиммасига қўшимча функциялар юкланди.
“Ёшларни хорижий тилларга ўқитиш тизими самарадорлигини ошириш бўйича қўшимча чора-тадбирлар тўғрисида”ги қарорга кўра, Ёшлар ишлари агентлиги ёшларни хорижий тилларга ўқитиш жараёнларини такомиллаштириши, талаб юқори бўлган чет тилларини мукаммал ўзлаштириш учун шароитларни кенгайтириши лозим.
Агентлик хорижий тилларни ўқитиш фаолияти билан шуғулланувчи ЯТТлар, ўзини ўзи банд қилган шахслар ҳамда нодавлат таълим ташкилотлари (хусусий ўқув марказлари), ушбу йўналишда фаолият юритувчи бошқа нодавлат нотижорат ташкилотларини ривожлантириш ва қўллаб-қувватлаш, соҳадаги муаммоларни мунтазам равишда таҳлил қилиши ва уларнинг ечими бўйича таклифлар тайёрлаши керак.
Шунингдек, хусусий ўқув марказлари рейтингини шакллантириш ҳамда рейтингда юқори ўринни эгаллаганларни рағбатлантириш билан шуғулланди.
Ёшлар орасида касб-ҳунар ва хорижий тилларни ўрганишни тарғиб қилиш, ушбу йўналишдаги ижтимоий лойиҳалар, кўрик-танлов ва олимпиадаларни ташкил этиш ҳам агентликка қўшимча функция сифатида юкланди.
- Маълумот учун, Ёшлар ишлари агентлиги 2020 йил 30 июнда ташкил этилган.
- Агентлик ёшлар билан боғлиқ муаммоларни ечиш, иқтидорли ёшларни рағбатлантириш билан шуғулланади.
- 2024 йилда Ёшлар ишлари агентлиги Вазирлар Маҳкамасига ўтказилди.
Изоҳ (0)