Шавкат Мирзиёев Дарбанд ва Маҳачқалъа шаҳарларида содир этилган террорчилик ҳаракатлари оқибатида кўплаб ҳуқуқни муҳофаза қилиш идоралари ходимлари ва фуқаролар қурбон бўлгани муносабати билан Россия президенти Владимир Путинга мактуб йўллаб, чуқур ҳамдардлик билдирди. Бу ҳақда президент матбуот котиби Шерзод Асадов маълум қилди.
Ўзбекистон етакчиси Доғистондаги террорчилик ҳужумларини қатъий қоралади ҳамда ушбу таҳдидларга қарши курашда тегишли тузилмаларнинг фаол ҳамкорлигини давом эттиришга тайёрлигини билдирди, — дейилади хабарда.
23 июнь куни Доғистоннинг Дарбанд шаҳрида қуролланган номаълум шахслар синагога ва черковга ҳужум қилди ва полиция ходимларига ўқ узди. Доғистон Ички ишлар вазирлиги ҳужум оқибатида 6 нафар полициячи ҳалок бўлгани, 12 нафари яралангани ҳақида хабар берди. Шимолий Осетиядаги хавфсизлик кучлари Доғистондаги воқеалардан сўнг кучайтирилган хизмат режимига ўтказилди.
Кейинроқ Дарбанд ва Маҳачқалъада қуролли ҳужум уюштирган олти нафар жангари ўлдирилгани маълум қилинди. Доғистонда 15 дан ортиқ полициячи ҳужум қурбонига айланган. Ҳозирда йўқ қилинган жангариларнинг шерикларини қидириш давом этмоқда.
Изоҳ (0)