Фарғона вилояти Бешариқ туманида одамлар ўлимига сабаб бўлган икки нафар ҳайдовчига суд ҳукми ўқилди. Бу ҳақда ИИВ Йўл ҳаракати хавфсизлиги хизмати хабар берди.
Қайд этилишича, 2023 йил 10 декабрь куни Бешариқ туманида ташкил этилган қишлоқ хўжалиги ходимлари куни тадбирига борган фуқаро Қ.ни Яйпан—Рапқон йўналишида ҳаракатланаётган Damas машинаси уриб юборган. Оқибатда пиёда оғир тан жароҳатлари олиб, шифохонада вафот этган.
Ўтказилган суд авто-техник экспертиза хулосасига кўра, ҳайдовчи пиёда йўлнинг ўртасида турганини 20 метр узоқликдан кўрган бўлса ҳам Damas’ни ўз вақтида тўхтатиб қола олмаган.
Яқинда ўтказилган суд мажлисида марҳумнинг вакили ҳайдовчидан моддий ва маънавий зарар олмаслигини ҳамда унга қонуний чора кўрилишини сўраган.
Суд ҳайдовчини Жиноят кодексининг 266-моддаси 2-қисми билан айбдор деб топган. Уни барча турдаги транспорт воситаларини бошқариш ҳуқуқидан маҳрум қилган ҳолда 4 йилга озодликдан маҳрум этиш жазосини тайинланган.
Яна бир ҳолатда Бешариқ—Навкат йўналишида ҳаракатланиб келаётган “ЗИЛ-130” юк машинаси йўлнинг чап томонига бурилаётиб Matiz машинасини ўтказиб юбормаган ва ЙТҲ содир этган.
Оқибатда Matiz машинасида бўлган уч киши тан жароҳатлари олган, бир киши воқеа жойида вафот этган.
Суд “ЗИЛ” ҳайдовчисини Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан айбдор деб топган. “ЗИЛ” ҳайдовчиси марҳумнинг дафн маросими ва Matiz’ни таъмирлаш учун 128 миллион сўм тўлаб бергани ва бошқа ҳолатлар инобатга олинган.
Суд “ЗИЛ” ҳайдовчисини 3 йил транспорт воситаларини бошқариш ҳуқуқидан маҳрум қилган ҳолда, унга 2 йил озодликдан маҳрум этиш жазосини тайинлаган.
Бундан олдин Тошкентда содир бўлган йўл-транспорт ҳодисаси оқибатида бир киши вафот этгани, Сурхондарёда одам ўлими билан боғлиқ авария содир бўлгани, Тошкентда Tesla ҳамда Lacetti бир-бири билан тўқнашгани тўғрисида хабар берилганди.
Изоҳ (0)