Ўзбекистонда 68 нафар боланинг ўлими ва 16 нафар боланинг тўшакка михланиб қолишига сабабчи бўлган “Док-1 Макс” сиропи билан боғлиқ шикоят аризаларни кўриб чиқаётган апелляция инстанцияси 20 май куни давом этган мажлисини бир оз муддат прокурорсиз давом эттирди. Бу ҳолат “Дарё” нашри орқали жамоатчиликка очиқлангач, прокурор суд залига қайтди.
Судланувчилардан бири прокурорнинг суд залидан чиқиб кетишига муносабат билдириб, “Прокурор бизнинг важларимизни ҳам эшитса, яхши бўларди”, дея судлов ҳайъатига мурожаат қилди. Суд ҳайъати раиси прокурор бошқа мажлисда ҳам қатнашаётгани боис залдан чиқиб кетганини маълум қилди. Судланувчи бунга эътироз билдирар экан “прокурор бизга муддат сўраётган пайтда бошқа суд мажлисида ўтирмайди-ку, нега ҳозир жойида эмас”, — деди. Судья бунга сукут билан жавоб қайтарди.
Апелляция инстанциясининг судни прокурорсиз давом эттираётгани “Дарё”нинг Telegram’даги каналлари орқали жамоатчиликка очиқлангач, кўп ўтмай прокурор суд залига қайтди. Ва судланувчига унинг ҳар бир гапини, важини эшитаётганини, суд якуни бўйича хулоса қилинаётганда важларини инобатга олишини маълум қилди.
Судланувчи гапига қўшимча тарзда мазкур суд мажлисида ҳаёти ҳал бўлаётганини, биринчи инстанция томонидан тайинланган жазо ўзгаришсиз қолса, 50 ёшида қамоқдан чиқишини айтиб, айбсизлигини исботлашга уринаётганини билдирди. Шунингдек, у судлов ҳайъати раисига юзланиб, уни ҳимоясига олиши кераклигини, суд залидан чиққач, карцерга қамаб қўйишларидан қўрқишини таъкидлади. Судлов ҳайъати раиси ўша пайтдан бошлаб судланувчи Ш.Шодмонов унинг ҳимоясида эканини айтди.
Изоҳ (0)