O‘zbekistonda 68 nafar bolaning o‘limi va 16 nafar bolaning to‘shakka mixlanib qolishiga sababchi bo‘lgan “Dok-1 Maks” siropi bilan bog‘liq shikoyat arizalarni ko‘rib chiqayotgan apellyatsiya instansiyasi 20-may kuni davom etgan majlisini biroz muddat prokurorsiz davom ettirdi. Bu holat “Daryo” nashri orqali jamoatchilikka ochiqlangach, prokuror sud zaliga qaytdi.
Sudlanuvchilardan biri prokurorning sud zalidan chiqib ketishiga munosabat bildirib, “Prokuror bizning vajlarimizni ham eshitsa, yaxshi bo‘lardi”, deya sudlov hay’atiga murojaat qildi. Sud hay’ati raisi prokuror boshqa majlisda ham qatnashayotgani bois zaldan chiqib ketganini ma’lum qildi. Sudlanuvchi bunga e’tiroz bildirar ekan “prokuror bizga muddat so‘rayotgan paytda boshqa sud majlisida o‘tirmaydi-ku, nega hozir joyida emas”, — dedi. Sudya bunga sukut bilan javob qaytardi.
Apellyatsiya instansiyasining sudni prokurorsiz davom ettirayotgani “Daryo”ning Telegram’dagi kanallari orqali jamoatchilikka ochiqlangach, ko‘p o‘tmay prokuror sud zaliga qaytdi. Va sudlanuvchiga uning har bir gapini, vajini eshitayotganini, sud yakuni bo‘yicha xulosa qilinayotganda vajlarini inobatga olishini ma’lum qildi.
Sudlanuvchi gapiga qo‘shimcha tarzda mazkur sud majlisida hayoti hal bo‘layotganini, birinchi instansiya tomonidan tayinlangan jazo o‘zgarishsiz qolsa, 50 yoshida qamoqdan chiqishini aytib, aybsizligini isbotlashga urinayotganini bildirdi. Shuningdek, u sudlov hay’ati raisiga yuzlanib, uni himoyasiga olishi kerakligini, sud zalidan chiqqach, karserga qamab qo‘yishlaridan qo‘rqishini ta’kidladi. Sudlov hay’ati raisi o‘sha paytdan boshlab sudlanuvchi Sh.Shodmonov uning himoyasida ekanini aytdi.
Izoh (0)