Бугун, 29 май куни Тошкент метрополитени вагон паркига яна янги тўрт вагонли 3 та замонавий метро поездлари олиб келинди. Бу ҳақда метрополитен матбуот хизмати хабар берди.
Ушбу ҳаракат таркиблари белгиланган йўриқномага асосан, 7-10 кун давомида техник синовдан ўтказилиб, сўнгра йўловчиларга хизмат қилиши йўлга қўйилади.
Шунингдек, йўналишлардаги вақт интервалларини янада қисқартириш мақсадида, янги ҳаракат таркиблари асосан, “Ерусти ҳалқа йўли йўналиши”да ҳаракатга чиқарилади.
“Ўзбекистон–2030” стратегиясининг барқарор иқтисодий ўсиш орқали аҳоли фаровонлигини таъминлаш йўналиши бўйича 2024 йилга мўлжалланган амалий тадбирлар режасида Тошкент жамоат транспорти тизимини ривожлантириш ҳам кўзда тутилганди. Унда Тошкент метрополитени учун 11 та янги метро поездини (44 та вагон) харид қилиш белгиланганди.
Эслатиб ўтамиз, февраль ойида тўрт вагонли янги 3 та метро ҳаракат таркиби олиб келинганди. Апрель ойида эса яна тўрт вагонли иккита янги метро поездлари келтирилган.
Изоҳ (0)