“АҚШ бизнинг ядровий давлат мақомимизни тан олиши лозим” — КХДР раҳбарининг синглиси

Шимолий Корея етакчиси Ким Чен Иннинг синглиси Ким Ё Жонг АҚШдан мамлакатининг ядровий давлат сифатидаги “кечиб бўлмас” мақомини тан олишни талаб қилди. Бу ҳақда маҳаллий нашрларга таяниб, Al Jazeera хабар берди.

Ким Ё Жонгнинг таъкидлашича, мулоқотлар ҳеч қачон Пхеньяннинг ядро қуролларидан воз кечишига олиб келмайди.

“Пхеньян кучли ядровий воситаларга эга давлат сифатида собит турибди. Буни рад этишга уринишлар Шимолий Корея халқининг иродасига қарши чиқиш бўлади ва қатъиян рад этилади. Ядро қуролларидан воз кечиш энди кун тартибида эмас”, деган у.

Унинг таъкидлашича, ҳозирги геополитик вазият ва мамлакат қудрати тубдан ўзгарган, ва бу барча келажакдаги қарорлар учун асос бўлиши лозим.

Шимолий Корея ташвиқот бўлимига раҳбарлик қилувчи Ким Ё Жонг АҚШ билан доимий қарама-қаршилик на Пхеньян, на Вашингтонга фойда келтиришини таъкидлади. У АҚШни янги ёндашув асосида мулоқот қилишга чақирди.

Ё Жонг, шунингдек, Ким Чен Ин билан АҚШ президенти Дональд Трамп ўртасидаги муносабатлар “ёмон эмас”лигини айтиб ўтган. Бироқ бу ядро қуроли ишлаб чиқаришга тўсқинлик қилмаслиги таъкидланиб, ядросизлантиришга қаратилган ҳаракатлар “масхаралаш” сифатида қабул қилиниши айтилган.

“Агар АҚШ реал вазиятни тан олмаса, Шимолий Корея билан янги учрашув фақатгина Вашингтоннинг умиди бўлиб қолади”, дея қўшимча қилган Ким Ё Жонг.

Трамп янги мулоқотга тайёрми?

Маълумки, Трамп 2018-2019 йилларда Ким Чен Ин билан 3 марта учрашган — Сингапур, Вьетнам ва Жанубий Корея чегарасида. Гарчи бу тарихий учрашувлар эътиборга лойиқ бўлса-да, Пхеньян ядро дастурини тўхтатмаган. Июнь ойида Оқ уй матбуот котиби Каролин Леавит Трамп Сингапурдаги мулоқот асосида музокараларни давом эттириш ниятида эканини билдирганди.

Мутахассислар: йанги музокаралар ўтказилиши мумкин, лекин шартлар ўзгарган

АҚШдаги Стимсон маркази Корея дастури директори Женни Таун шундай деди:

“Денуклеаризация бўйича эски гаплар энди долзарб эмас. 2019 йилдан бери жуда кўп нарса — ядро қуролларини ривожлантириш, қонунчилик, сиёсатдаги ўзгаришлар ва глобал геополитик фон — ўзгарди”.

Унга кўра, агар музокаралар қайта тикланса, бу сафар улар ядросизлантиришга эмас, бошқа форматдаги мулоқотга асосланган бўлади.