Ғазо ҳукумати оммавий ахборот воситалари идораси анклавда очарчилик ва инқирознинг олдини олиш учун ҳафтасига 500 минг қопдан кам бўлмаган ун лозимлигини таъкидлади. Бу ҳақда Al Jazeera хабар берди.
Telegram’да эълон қилинган ОАВ баёнотида айтилишича, Ғазога юзлаб ёрдам машиналари кириб келгани ҳақида ёлғон хабарлар тарқалган.
“Биз бу даъволарни қатъиян рад этамиз, чунки бу мутлақо ҳақиқатга тўғри келмайди. Биз дунёнинг барча давлатларини қамални зудлик билан бузишга, ўтиш йўлларини очишга, болалар озуқасининг киришига рухсат беришга ва Ғазо секторида қамалда қолган 2,4 миллиондан ортиқ одамга ёрдам беришга чақирамиз”, дейилган ОАВ баёнотида.
Секторда очарчилик давом этмоқда
Ғазо шифохоналарида бугунгача Исроилнинг блокадаси фонида очарчилик ва тўйиб овқатланмаслик билан боғлиқ 115 дан ортиқ ўлим қайд этилган. Хусусан, 22 июль куни бир суткада тўйиб овқатланмаслик ва очарчиликдан 15 киши, жумладан, 4 нафар бола ҳалок бўлган.
Аввалроқ тиббий манбалар диабетга чалинган бола ва чақалоқ ҳам ўткир озиқ-овқат танқислигидан азият чекиб вафот этганини маълум қилганди. Ғазо ўз тарихидаги энг ёмон гуманитар инқирозлардан бирини бошдан кечирмоқда. Хусусан, 2023 йил октябрь ойидан бери Исроил томонидан давом эттирилаётган геноцид фонида анклав бўйлаб очарчилик кенг тарқалган. Исроил 2 мартдан бери барча чегара ўтиш жойларини ёпиб, озиқ-овқат ва тиббий ёрдамнинг киришини тўсиб қўйган. Оқибатда болалар ва сурункали касалликка чалинган беморларда ўткир тўйиб овқатланмаслик аломатлари пайдо бўлган.
Исроил 2023 йил октябрь ойидан бери Ғазо секторида 59 мингдан ортиқ фаластинликнинг — аксарият аёллар ва болаларнинг — ўлимига сабаб бўлди. Ҳарбий ҳаракатлар анклавни вайрон қилди, соғлиқни сақлаш тизимини издан чиқарди ва кучли озиқ-овқат танқислигига олиб келди.
Изоҳ (0)