АҚШ 2008 йилдан бери биринчи марта Буюк Британияга ядровий қурол етказиб берди. Бу ҳақда Bloomberg хабар берди.
Маълум қилинишича, гап B61-12 термоядровий бомбалари ҳақида кетмоқда. У Boeing C-17 самолётида ташилган, учоқнинг парвозини ядровий транспорт кучлари назорат қилган. 16 июль куни АҚШ ҳарбий самолёти транспондерни ёқиб, Нью Мексико штатининг Албукерке шаҳридаги Киртленд авиабазасидан ҳавога кўтарилган. У Британиянинг Лейкенхит авиабазасига қўнган.
Бутун парвоз давомида ҳаво кемаси ўз жойлашувини онлайн тарзда кўрсатиб борган. Учоқ бошқа давлат ҳудуди устидан парвоз қилмаган. АҚШ ва Буюк Британия ҳукуматлари анчадан бери ўз ядровий қуролларининг мақоми ва жойлашувига изоҳ бермаяпти.
Ядро қуролларининг бундай очиқ тарзда ташилиши Россия президенти Владимир Путинга АҚШ Европа хавфсизлигини ҳимоя қилишга қатъий эканини кўрсатувчи ўзига хос сигнал бўлиши мумкин, деб ҳисоблайди мутахассислар.
Британия июнь ойида B61-12 ядровий бомбаларини олиб юришга қодир камида 12 та Америка Ф-35А қирувчи самолётларини сотиб олишини эълон қилганди.
Изоҳ (0)