Исроил махфий маълумотлари: Ғазода қурбонларнинг 83 фоизи тинч аҳоли бўлган

Ғазо секторида Исроил кучлари томонидан ўлдирилган ҳар 6 фаластинликдан беш нафари тинч аҳоли бўлган. Бу сўнгги ўн йилликларда урушларда камдан-кам учрайдиган даражада юқори кўрсаткичдир.

Исроил ҳарбий разведкасининг ўз маълумотларига кўра, қурбонларнинг 83 фоизини тинч аҳоли ташкил этган. Уруш бошланганидан 19 ой ўтиб, май ойига келиб, ҲАМАС ва Фаластин Исломий Жиҳоди гуруҳининг 8 900 нафар аъзоси “ҳалок бўлган” ёки “эҳтимол ўлган” сифатида рўйхатга киритилган. Шу даврда жами 53 минг фаластинлик ўлдирилгани қайд этилган.

Улар орасида жангчилар ва тинч аҳоли ҳам бор эди. Бироқ Исроил разведкаси маълумотларида қурбонларнинг 17 фоизигина “жангарилар” бўлгани таъкидланган. Бу эса ҳалок бўлганларнинг 83 фоизи тинч аҳоли вакиллари эканини кўрсатади.

Ҳалок бўлганлар орасида тинч аҳолининг улуши замонавий урушлар учун фавқулодда юқори кўрсаткич. Ҳатто оммавий қирғинлари билан танилган Сурия ва Судан фуқаролар урушларидан ҳам юқорироқдир.

“Қурбонлар орасида тинч аҳолининг бундай катта улуши ғайриоддий ҳолат, айниқса можаро узоқ вақт давом этаётганини инобатга олсак”, деди тинч аҳоли талофатларини дунё бўйлаб кузатиб борадиган Уппсала Можаро маълумотлари дастури (УCDP) вакили Тересе Петтерссон.

Унинг сўзларига кўра, 1989 йилдан буён УCDP кузатган глобал можароларда тинч аҳоли улуши бундан юқори бўлган ҳолатлар фақат Сребреница қатлиомида (аммо бутун Босния урушида эмас), Руандадаги геноцидда ва 2022 йилда Россиянинг Мариуполни қамал қилиши пайтида кузатилган.

Ғазода 2023 йил октябрдан буён 62 мингдан ортиқ киши ҳалок бўлди.

Одамлар ўлимидан сўнг террорчи мақомига кўтарилади. Бригада сўзларига ишонганимда, ҳудудда ҲАМАС жангчиларининг 200 фоизини ўлдирганмиз, деган хулосага келардим, деди жойларда ҳарбий кучларга ҳамроҳлик қилган разведка манбасининг бири. 

Истеъфодаги генерал Ицҳак Брик айтишича, сиёсатчилар ҲАМАС қурбонлари сони бўрттириб кўрсатилаётганини билади. Брик уруш бошида бош вазир Биньямин Нетаньяхуга маслаҳат берган ва ҳозирда унинг энг қаттиқ танқидчиларидан бирига айланган.

Эълон қилинаётган рақамлар билан амалда содир бўлаётган воқеалар ўртасида ҳеч қандай боғлиқлик йўқ. Бу шунчаки катта бир алдовдир, дея таъкидлаган у.