Хитойнинг Тайванга бостириб кириши “муқаррар бўлиши мумкин” ва шунинг учун АҚШнинг Ҳинд-Тинч океани минтақасидаги иттифоқчилари мудофаа харажатларини ошириши керак. Бу ҳақда АҚШ мудофаа вазири Пит Хегсетга таяниб, Financial Times хабар берди.
Вазирнинг сўзларига кўра, Хитойнинг Тайванни “босиб олишга уриниши” минтақанинг Ҳинд-Тинч океани ва бутун дунё учун “ҳалокатли оқибатларга олиб келади”. У Пекин Осиёда гегемон бўлишни исташини ва шунга мувофиқ ҳаракат қилаётганини айтди. Вазир бу шошилинч “хавотир қўнғироғи” бўлиши кераклигини таъкидлади.
Буни гўё чиройли кўрсатишга ҳеч қандай асос йўқ. Хитойдан келаётган таҳдид — бу реал ва эҳтимол, муқаррар бўлиши мумкин. Умид қиламизки, ундай бўлмайди, лекин шундай бўлиши эҳтимоли жуда юқори.
Си ўз ҳарбийларига 2027 йилгача Тайванга бостириб киришга тайёр бўлишни буюрган. Пекин бунинг учун зарур бўлган армия тузмоқда, ҳар куни машғулотлар ўтказмоқда ва ҳақиқий ҳаракатларга тайёргарлик кўрмоқда, деди вазир.
Ҳинд-Тинч океани минтақаси Трамп администрацияси учун устувор аҳамиятга эга. Пентагон раҳбарига кўра, АҚШ ўзини у ердан “сиқиб чиқаришга” ва иттифоқчилари ҳамда ҳамкорларини “бўйсундириш ва қўрқитишга” йўл қўймайди.
Биз урушга, урушнинг олдини олишга, куч билан тинчликка эришишга тайёрланяпмиз, деди у.
Шунингдек, мудофаа вазири АҚШ Хитой билан зиддият изламаётганини таъкидлади. У Трамп ҳам, Америка халқи ҳам бу мамлакатга ҳурмат билан қарашини айтди. Пит Хегсет Европа давлатлари ҳам Ҳинд-Тинч океани минтақасида ўз иштирокини кўпайтиришини исташини билдирди. Бу Хитойни тийиб туриш учун “фойдали” бўлишини қайд этди.
Изоҳ (0)