Шимолий Корея етакчиси Ким Чен Иннинг синглиси Ким Ё Чжон Жанубий Корея президенти Ли Чже Мённинг ярашишга қаратилган саъй-ҳаракатларини рад этди. Бу ҳақда Шимолий Корея давлат оммавий ахборот воситаларига таяниб Al Jazeera хабар берди.
Маълум қилинишича, Ким Ё Чжон Жанубий Кореянинг чегарада ташвиқот эшиттиришларини тўхтатиш қарорини “илгари қилмаслик керак бўлган ишни вақтинча бекор қилиш” дея изоҳлаган.
“Агар Сеул бир неча ҳиссиётли сўзлар билан аввалги сиёсий воқеаларга кўз юмиш мумкин деб ўйлаган бўлса, бу энг катта хатодир”, деган у.
Шунингдек, у жанублик расмий Ким Чен Инни APEC саммитига таклиф қилишни ёқлаб чиққанини “хомҳаёл” деб баҳолаган. Ким Ё Чжоннинг фикрича, янги ҳукуматнинг АҚШ билан ҳарбий иттифоққа ишончи ва Пхеньянга қарши туришга интилиши аввалги консерватив президент Юн Сок Ёл давридаги сиёсатдан деярли фарқ қилмайди.
“Сеул қандай сиёсат юритишидан ва қандай таклифлар киритишидан қатъий назар, биз улар билан қизиқмаймиз. Жанубий Корея билан учрашишга ҳам, гаплашишга ҳам ҳеч қандай сабаб йўқ”, дея таъкидлаган Ким Ё Чжон.
Маълумот учун, Жанубий Корея президенти Ли Чже Мён июнь ойида Юн Сок Ёл истеъфога чиқарилгач, ҳокимият тепасига келган эди. Унинг демократик партияси Шимолий Корея билан илиқ муносабат тарафдори саналади.
Изоҳ (0)