АҚШ президенти Дональд Трамп 1 августдан бошлаб Жанубий Корея ва Ҳиндистондан импорт қилинадиган маҳсулотларга янги бож ставкалари жорий этилишини маълум қилди. Бу ҳақда BBC хабар берди.
Жанубий Корея: Автомобиль ва чиплар учун 15 фоиз, металга эса 50 фоиз бож
Трамп Жанубий Корея билан “тўлиқ ва мукаммал” савдо келишувига эришилганини айтиб, ушбу мамлакатдан импорт қилинадиган автомобиль ва яримўтказгичларга 15 фоизлик бож жорий этилишини билдирган. Агар икки мамлакат савдо келишувига эришмаганида, бу рақам 25 фоизгача кўтарилиши мумкин эди.
Бундан ташқари, Жанубий Кореянинг пўлат ва алюминий маҳсулотларига ҳам бутун дунё давлатлари учун белгиланган умумий ставка – 50 фоизлик бож амал қилади.
Келишув доирасида Сеул АҚШ иқтисодиётига 350 миллиард доллар сармоя киритади. Бу маблағнинг 150 миллиард доллари АҚШда кемасозлик, жумладан, ҳарбий кемалар қурилишини қўллаб-қувватлашга йўналтирилади.
Жанубий Корея президенти Ли Же Мёнг бу битимни “мамлакатимиз манфаатларига мос ва рақобатбардош шароит яратадиган келишув” сифатида баҳоламоқда. Энг муҳим ютуқлардан бири — АҚШдан келадиган гуруч ва мол гўшти импортини оширмаслик бўйича Жанубий Корея истаган талаблар сақлаб қолинганидир.
Ҳиндистон Россия билан савдо муносабатлари сабаб “жазога тортилади”
Трамп Ҳиндистонга нисбатан анча кескин чоралар кўришини эълон қилди. Жумладан, 1 августдан бошлаб ушбу давлатдан олиб кириладиган маҳсулотларга 25 фоизлик бож солинади. Бундан ташқари, Ҳиндистоннинг Россиядан қурол-яроғ ва нефть харид қилаётганига жавобан “алоҳида жазо солиғи” ҳам қўлланилади. Аммо, бу жазога ҳали аниқлик киритилмаган.
“Ҳиндистон бизнинг дўстимиз, бироқ унинг товарларига қўйиладиган бож ставкалари дунёдаги энг юқориларидан бири бўлади”, деди Трамп.
У Ҳиндистон Россиядан ҳарбий техника ва энергия харид қилишда давом этаётганини танқид қилиб, Москванинг Украинадаги қон тўкишини тўхтатиш лозимлигини қўшимча қилган.
Ҳиндистон ҳукумати эса бунга жавобан “ўзаро манфаатли, адолатли ва мувозанатли” савдо келишувини тузишга интилишини билдирган. АҚШ ва Ҳиндистон ўртасидаги савдо ҳажми 2024 йилда 190 миллиард долларни ташкил этган. Аммо икки давлат ўртасидаги савдо камомади 45,8 миллиард долларга тенг.
Трамп Ҳиндистоннинг айрим маҳсулотларга, жумладан, Бурбон вискиси ва мототциклларга бож ставкаларини аллақачон пасайтирганини айтиб, умумий савдо мувозанатини тиклаш лозимлигини таъкидламоқда. Умуман олганда икки давлат раҳбарлари савдо ҳажмини 500 миллиард долларга етказишни мақсад қилган.
Изоҳ (0)