Россия 2025 йилда армия билан шартнома тузган камида 902 нафар Ўзбекистон фуқаросини урушга ёллади. Улар орасида 19 ёшли фуқаролар ҳам бор. Бу ҳақда манбаларга таяниб “Хочу жит” (“Яшашни хоҳлайман”) лойиҳаси хабар берди.
Маълум қилинишича, ўзбекистонликларни ёллаш учун Россия аввалгидек усуллардан фойдаланмоқда. Жумладан, меҳнат муҳожири сифатида келган Ўзбекистон фуқаролари юқори маошли иш баҳонасида қурилишларга ёки армиянинг фронторти бўлинмаларига ёлланади. Асосий рағбат сифатида уларга Россия фуқаролиги ваъда қилинади.
Россия қамоқхоналарида жазо муддатини ўтаётганлар таҳдид ва руҳий босим орқали урушга жалб қилинмоқда, дейди “Хочу жит” лойиҳаси.
Ёллаш кўпинча шантаж билан бирга кечиши мумкин. Бу асосан Россия фуқаролигини яқинда олган муҳожирларга нисбатан кенг қўлланади. Россия Тергов қўмитаси раиси Александр Бастрикин 5 мингдан ортиқ рейд ўтказилгани, улар давомида 90 минг киши “ушланганини” айтганди. Уларнинг 30 минг нафари шартнома имзолаб, урушга жўнатилган.
Ўзбекистон фуқаролари Украинадаги урушга аввал ҳам юборилган
Апрель ойида “Хочу жит” лойиҳаси Россия армияси билан шартнома тузиб, Украинага қарши урушда қатнашган 1100 киши ҳақидаги маълумотларни ошкор қилган эди. Ўшанда рўйхат тўлиқ эмаслиги, агар Россия армияси сафида жанг қилаётган этник ўзбеклар ҳисобга олинса, уларнинг сони бир неча минг кишига етиши таъкидланган.
Урушга ёлланган фуқароларнинг катта қисмини 25 дан 50 ёшгача бўлганлар ташкил этган. “Хочу жит” 1100 кишига оид маълумотларни қандай қўлга киритганини очиқламаган.
Ўзбекистон Ташқи ишлар вазирлиги муносабати
Ўзбекистон расмийлари Украинага қарши урушда Россия армиясига ёллангани айтилаётган ўзбекистонликлар рўйхати бўйича текширув олиб бормоқда. Ташқи ишлар вазирлиги матбуот котиби Аҳрор Бурҳонов бу маълумотлар ваколатли органлар томонидан текширилаётганини айтган.
У Ўзбекистон фуқароларининг хорижий ҳарбий ҳаракатларда иштирок этиши тақиқланганини таъкидлаб, маълумотлар тасдиқланса, тегишли чоралар кўрилишини билдирганди. Бироқ, мазкур баёнотдан кейин Ўзбекистон фуқароларининг урушга ёллангани эҳтимоли бўйича ҳеч қандай маълумот берилмаган.
Ўзбекистон фуқароларига чет давлатларининг ҳарбий хизматига ёлланиш тақиқланган
Ўзбекистон Жиноят кодексининг 154-моддасига кўра, ҳарбий ҳаракатларда қатнашиш учун ёлланиш 10 йилгача озодликдан маҳрум этишга сабаб бўлади. Урушга одамларни ёллаш, уларни ўқитиш ва улардан ҳарбий ҳаракатларда фойдаланиш 12 йилгача озодликдан маҳрум қилишга олиб келади.
Жиноят кодексининг 154-1-моддасига асосан, чет давлатлар ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланган Ўзбекистон фуқаролари 5 йилгача озодликдан маҳрум қилинади.
Изоҳ (0)