Ҳиндистон ҳукумати апрель ойида Кашмир минтақасида юз берган теракт ортида турган 3 нафар ҳужумчи ўлдирилганини маълум қилди. Бу ҳақда 29 июль куни Ҳиндистон ички ишлар вазири Амит Шаҳ парламентда маълум қилди.
Амит Шаҳнинг айтишича, “Маҳадев” номли махсус операцияда Ҳиндистон армияси, Марказий захира полицияси ҳамда Жамму ва Кашмир полицияси томонидан ушбу ҳужумда айбланаётган 3 нафар жангари йўқ қилинган.
“Паҳалгам водийсида фуқароларимизни қатл қилган айнан мана шу 3 террорчи эди. Уларнинг барчаси йўқ қилинди”, деди у.
Вазирга кўра, йўқ қилинган шахсларнинг барчаси Покистон фуқаролари бўлган.
Маълумот учун, апрель ойида Кашмирнинг Паҳалгам водийсида қуролланган шахслар тинч аҳолига ўт очиб, 26 кишини, асосан, ҳиндистонлик сайёҳларни ўлдирганди. Бу воқеа бутун Ҳиндистонда ғазаб уйғотиб, Деҳли ва Покистон ўртасида қуролли тўқнашувларни келтириб чиқарганди.
Ҳиндистон ҳужум ортида Покистонни айблаган, бироқ Исломобод бу айбловни рад этган. Воқеадан сўнг, Нью Деҳли қўшни мамлакат ҳудудига бир неча бор авиазарбалар уюштирган. Бунга жавобан Покистон ҳам ўз ҳарбий операциясини бошлаб, икки томоннинг тўқнашувида кўплаб одамлар ҳалок бўлганди.
Шаҳнинг айтишича, май ойида Ҳиндистон разведкаси ушбу жангариларнинг Сринагар шаҳри яқинидаги Дачигам миллий боғида яширинганини аниқлаган ва бир неча ой давомида бу маълумотнинг аниқлиги текширилган.
Қайд этилишича, Кашмир минтақаси 1947 йилда Буюк Британия мустамлакасидан ажралиб чиққан икки давлат — Ҳиндистон ва Покистон ўртасида баҳсли ҳудуд саналади. Улар шу пайтгача бу ҳудудда 3 маротаба уруш олиб борган.
Апрель воқеасидан кейинги 4 кунлик тўқнашув сўнгги йилларлардаги энг кескин қуролли қарама-қаршилик бўлди. АҚШ президенти Дональд Трамп урушдан сўнг ўт очишни тўхтатиш келишуви Вашингтон воситачилигида тузилганини айтган. Бироқ Ҳиндистон бу даъвони рад этган.
Изоҳ (0)