“Маргимуш қабристони”ни Чорвоқ сув омборига хавф эканлиги тўғрисидаги хабарлар тарқалди. Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси бу текширилмаган, ҳақиқатга мос келмайдиган ҳамда айрим фейк аккаунтлардан олинган ёлғон маълумот эканлигини билдирди.
Бошқарма матбуот хизмати ахборотида билдирилишича, мурожаатда таъкидланган, Тошкент вилояти, Бўстонлиқ туманининг “Яккатут” МФЙ ҳудудида 1938—1946 йилларда собиқ “Союзмишяк” комбинати томонидан 0,64 га ер майдонига тахминан 40 минг тонна маргимуш чиқиндилар атрофи ва устки қисми бетонланиб, ҳаво чиқариш трубалари ўрнатилиб, кўмилган. Бетон устидан 70-80 сантиметр қалинликда тупроқ ётқизилган.
“Мурожаатда маргимуш қабристони ҳақида айтилган хавотирли фикрлар 2022 йилдаги ҳолат бўйича берилган бўлиб, бугунги кунда қабристон атрофи бетон тўсиқли деворлар билан ўраб, консервация қилинган ва ҳудуд бўйлаб симёғочлар ҳамда назорат учун камералар ўрнатилган”, дейилади бошқарма хабарида.
-Z3mms573.avif)
Қайд этилишича, маргимуш таркибли чиқиндилар кўмилган махсус полигонни консервация қилиш учун объектнинг лойиҳа-смета ҳужжатлари ишлаб чиқилиб, ижобий экспертиза хулосалари олинган. Объект консервацияси бўйича Вазирлар Маҳкамасининг 2023 йил 9 августдаги 501-сонли фармойиши билан маблағ ажратилиб, пудратчи танлаб олинган. Пудратчи билан икки томонлама қиймати 3 миллиард 984 миллион 644 минг сўмлик шартнома имзоланган. Ушбу шартномага асосан объектни консервация қилиш ишлари 2024 йилда тўлиқ якунланган.
Лойиҳа доирасида қабристоннинг устки қисмига тоза инерт тупроқ ётқизилган ва девор қисмига ёмғир ва оқова сувларини ҳамда нам массани ўтказмаслик мақсадида бурғилаш (тешиш) ишлари амалга оширилган ва ушбу нуқталарга кимёвий суюқлик кальций хлорид суюлтирилиб, юқори босим остида натрий алюминат моддаси орқали, яъни ерости уколи қилиш ишлари амалга оширилган.
Шунингдек, Чиқиндиларни бошқариш ва циркуляр иқтисодиётни ривожлантириш агентлиги, Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси ҳамда тегишли ташкилот ходимлари билан ҳамкорликда ҳар чоракда режавий сув, тупроқ намуналарини олиб назорат мониторинг тадбирлари ўтказилиб бориши ташкил этилган.
Шунингдек, мазкур ҳудудларда ўрганиш жараёнида қабристонларнинг радиоактив фон даражасини аниқлаш учун махсус асбоблардан фойдаланилиб, радиоактив фон даражаси мазкур объектда тепадан пастга, устки қисмларида ҳаво тортувчи азбест қувурлари ҳамда дюкернинг кириш ва чиқиш қисмлари ўлчаб кўрилганда хавфсиз эканлиги аниқланган.
Тошкент вилояти Экология, атроф-муҳитни муҳофаза қилиш ва иқлим ўзгариши бошқармаси “Маргимуш қабристони” бўйича расмий маълумотларни тақдим этишга ва жойига чиққан ҳолда биргаликда ўганишга тайёр. Бу борада фуқароларимизни ижтимоий тармоқлардаги факе ва ассосиз маълумотларга ишонмасликни сўраймиз, дейилади расмий хабарда.
Тошкент вилояти Бўстонлиқ туманидаги Чорвоқ сув омбори бўйида озарбайжонлик тадбиркор Эмин Агаларов томонидан Sea Breeze Uzbekistan сайёҳлик мажмаси қурилиши кутилмоқда. Бу жамоатчилик орасида кег эътирозларга сабаб бўлмоқда. Экология вазири Азиз Абдуҳакимов 23 июль куни Тошкент шаҳрида ўтказилган матбуот анжуманида лойиҳа ҳужжатлари ҳали ҳукуматга тақдим этилмаганини билдириб, “Йўқ дейишдан олдин таклифини кўрайлик”, деб айтди. Азиз Абдуҳакимов лойиҳа ҳужжатлари тақдим этилгач, мажмуа қурилиши масаласи жамоатчилик муҳокамасига қўйилишига ваъда берди.
Изоҳ (0)