Тошкентдан Самарқанд ва Андижонга пулли йўллар қурилишини 2026 йилдан бошлаш режалаштирилмоқда. Бу ҳақда Иқтисодиёт ва молия вазирлигининг 2026—2028 йилларга мўлжалланган фискал стратегиясида келтирилган.
Унда айтилишича, мамлакат ҳудудлари ҳамда қўшни давлатлар ўртасида ўзаро боғлиқлигини яхшилашга қаратилган йирик инфратузилма лойиҳаларини амалга оширишга устуворлик қаратилади.
2026 йилда автомобиль йўллари соҳасида Тошкент—Самарқанд ва Тошкент—Андижон йўналишларида пулли автомобиль йўлларини қуриш лойиҳаларини амалга ошириш, халқаро молия институтлари маблағлари ҳисобидан халқаро автомагистрал йўлларни таъмирлаш ва барпо этиш чоралари кўрилади.
Шу билан бирга, илғор тажрибани инобатга олган ҳолда мавжуд йўлларнинг ўтказувчанлик қобилиятини ошириш ва хавфсизлигини яхшилаш бўйича комплекс чора-тадбирлар дастури амалга оширилади.
Темирйўл транспорти соҳасида Ўзбекистон—Қирғизистон—Хитой ва Ўзбекистон–Афғонистон–Покистон халқаро темирйўлларини барпо этишда фаол иштирок этиш, Тошкент—Самарқанд йўналишида тезюрар поездлар учун қўшимча янги темирйўл қуриш лойиҳасини бошлаш ҳамда Нукус—Мискин—Урганч—Бухоро янги тезюрар темирйўл линиясини ишга тушириш ҳамда янги тезюрар поездларнинг доимий қатновларини йўлга қўйиш чоралари кўрилади.
Ўзбекистондаги илк пулли йўлларнинг қурилиши ҳақида 2018 йилда хабар берилганди. 2022 йилда Давлат-хусусий шерикликни ривожлантириш агентлиги директори Зокир Бозоров Тошкент—Андижон ва Тошкент—Самарқанд пулли автомобиль йўллари 2026 йилгача қуриб битказилишини айтганди.
Мазкур лойиҳалар Жаҳон банки ва Европа тикланиш ва тараққиёт банки кўмагида амалга оширилиши маълум қилинган. Транспорт вазири ўринбосари Жасурбек Чориев 2025 йил июнуда “Дарё”га берган интервьюсида қурилишлар нега кечикканига изоҳ берганди. Унга кўра, Тошкент—Самарқанд ва Тошкент—Андижон пулли йўллари лойиҳаларига тузатиш киритилган. Ҳисоб-китоблар жараёни узоқ чўзилгани сабаб қурилиш кечикмоқда.
“Қурилиш қачон бошланиши ҳозир тендерда қатнашаётганларга боғлиқ жараён. Улар қандай талаблар қўйиши ҳам муҳим. Салоҳиятли компания тендерда қатнашиб, бизга яна озгина муддат беринглар, улгурмаймиз, дейдиган вазиятлар ҳам бўлади. Бу шунақа техник процес”, дея таъкидлаганди вазир ўринбосари.
Изоҳ (0)