Эроннинг “Персеполис” клуби кот-д’Ивуарлик ҳимоячи Серж Орье билан шартнома имзолаганини расман эълон қилди. Клуб матбуот хизматининг маълум қилишича, келишув 2026 йил ёзига қадар амал қилади.
32 ёшли футболчи ўтган мавсум давомида ҳеч бир клубда тўп сурмаган. Унинг сўнгги жамоаси Туркиянинг “Галатасарой” клуби бўлиб, у истанбулликлар таркибида 2022 йил февралдан 2024 йил июлгача фаолият юритган. Шундан сўнг Орье ҳеч қандай клуб билан шартнома тузмаган эди. Футболчи 2023/24 йилги мавсум “Галатасарой” таркибида жами 17 учрашувда майдонга тушиб, 2 ассист муаллифига айланган. Transfermarkt портали ҳимоячининг қийматини 1,5 миллион еврога баҳолаган.
Маълумот учун, Серж Орье “Тулуза”, “ПСЖ”, “Тоттенҳэм”, “Вильярреал” ва “Ноттингем Форест” клубларида ҳам ўйнаган.
Эслатиб ўтамиз, “Персеполис” ўтган мавсум Эрон чемпионатини 3-ўринда якунлаган. Теҳрон клуби чемпион бўлган “Трактор”дан 8 очкога ортда қолган.
Таъкидлаш жоизки, “Персеполис” сафида Ўзбекистон миллий терма жамоаси аъзоси Остон Ўрунов ҳам ҳаракат қилмоқда.
Изоҳ (0)