Ўзбекистон терма жамоаси Жаҳон чемпионати саралаши 9-турида БАА билан 0:0 ҳисобида дуранг ўйнаб, мундиал йўлланмасига эга чиқди. Ўзбекистон футбол ассоциацияси раисининг биринчи ўринбосари Равшан Эрматов ўйиндан кейин ушбу муваффақият ҳақида фикр билдирди.
ЖЧ йўлланмаси ҳақида
Ўзбекистон миллий футбол жамоаси тарихий муваффақиятга эришди. Бу кун нафақат юртимиз, балки бутун Осиё футболи учун эсда қоларли сана сифатида тарихга муҳрланди. Кучли рақиблар устидан қўлга киритилган ғалаба 37 миллионлик халқимиз учун чексиз қувонч манбаи бўлди. Бу — халқимиз 34 йил давомида интиқ кутган буюк натижа эди.
Жамоанинг муваффақиятли иштирокида давлат раҳбарининг роли беқиёс бўлди. Президент томонидан яратилган шароитлар, кўрсатилган эътибор ва ғамхўрлик футболчиларга ўз имкониятларини тўлиқ намоён этиш имконини берди. Президентимиз жамоани самимий табриклаб, ғалабада ҳукуматнинг кўрсатган ёрдами ва қўллаб-қувватлашини алоҳида таъкидлади. Бу эса спортчиларга янада катта куч ва ишонч бағишлади.
Жамоа ҳозирда 10 июнь куни Қатарга қарши бўлиб ўтадиган ўйинга тайёргарлик кўрмоқда. Сўнгги ғалаба уларга руҳий кўтаринкилик берди ва жамоа кейинги учрашувларга катта ишонч ва қатъият билан тайёрланмоқда.
Терма жамоа футтболчилар Ўзбекистонга қачон қайтади?
Футболчилар эртага, 6 июнь куни тушгача ватанга қайтиши кутилмоқда. Уларни сабрсизлик билан кутаётган халқимиз бу ғалабани чин дилдан нишонлашга тайёр турибди.
Ўзбекистон бугун футбол тарихида янги саҳифа очмоқда. Бу улкан муваффақият нафақат ўйинчиларнинг, балки бутун жамиятнинг бир ёқадан бош чиқариб ҳаракат қилганининг натижасидир. Янги бошланган бу даврда Ўзбекистон халқининг умиди катта, ишончи мустаҳкам. Футбол майдонида юртимиз овозини бутун дунёга эшиттирган бу ғалаба яна кўплаб зафарлар учун йўл очди.
Изоҳ (0)