YouTube платформасида узоқ кутилган “Аватар‑3” франшизасининг илк расмий трейлери тақдим этилди. Фильм “Олов ва кул” деб номланади. Видеороликда бу сафар нави халқининг олов элементи билан боғлиқ қабиласи кўрсатилган.
Фильмда Пандоранинг илгари кўрсатилмаган ҳудудлари, янги қаҳрамонлар ва аввалги қисмларда тилга олинмаган воқеалар кенгроқ очиб берилиши кутилмоқда.
Аввалроқ трилогиянинг учинчи қисми франшизадаги энг узун фильм бўлиши маълум қилинган эди. Унинг давомийлиги 3 соат 12 дақиқани ташкил қилади. Режиссёр Жеймс Кемерон бу вақт давомида томошабинлар нафақат Пандоранинг бетакрор манзараларидан, балки “янада мураккаб ва серқирра воқеалардан” ҳам баҳраманд бўлишини ваъда берган.
“Аватар” франшизаси тарихда энг кўп даромад келтирган фильмлар қаторига кирган бўлиб, унинг илк қисми 2009 йилда чиққан. Кейинги қисм “Аватар: Сув йўли” эса 2022 йилда намойиш этилиб, рекорд даражадаги касса натижаларга эришган. Шу сабаб янги қисм томошабинлар орасида катта қизиқиш уйғотмоқда.
Эслатиб ўтамиз, “Аватар: Олов ва кул” халқаро прокатга 2025‑йил 19‑декабрда чиқади. Фильмнинг чиқиши билан биргаликда франшизанинг кейинги, тўртинчи ва бешинчи қисмларини суратга олиш учун тайёргарлик жараёни бошланади.
Изоҳ (0)