Лондоннинг “Челси” клуби Амстердамнинг “Аякс” жамоасида тўп сураётган 19 ёшли ҳимоячи Йоррел Ҳато трансфери бўйича клуб билан келишувга эришди. Бу ҳақда Goal нашри хабар берди.
“Челси” Ҳатони 40 миллион еврога харид қилиши кутилмоқда. The Athletic нашрининг қўшимча қилишича, Йоррел ҳозирда Лондон клубида тиббий кўрикдан ўтишга тайёрланмоқда ва унинг “аристократлар” сафига кўчиб ўтиши яқин кунларда расман эълон қилиниши мумкин.
“Аякс” Ҳатони 60 миллион евро эвазига сотмоқчи эди, аммо музокаралар якунида “Челси” максимал 40 миллион евро таклиф қила олиши билдирган. Шунингдек, Йоррел келажакда Лондон клубида муваффақиятли ўйнаб кетса, амстердамликлар турли бонуслар ҳамда футболчининг кейинги трансферидан улуш олиш имконига эга бўлади.
Маълумот учун, футболчи ўтган мавсум “Аякс” сафида жами 50 учрашувда майдонга тушиб, ўз ҳисобига 3 та гол ва 6 та ассист ёздириб қўйган. Унинг клуб билан шартномаси 2028 йилнинг ёзига қадар амал қилади. Transfermarkt портали Йоррелнинг қийматини 35 миллион еврога баҳоламоқда.
Эслатиб ўтамиз, ўтган мавсум “Челси” Англия Премер Лигасида 4-ўринни эгаллаб, Европа Чемпионлар лигасида иштирок этиш ҳуқуқини қўлга киритди. Клуб Европа Конференциялар Лигаси ва Клублар ўртасидаги Жаҳон чемпионатида ҳам муваффақиятга эришди.
Изоҳ (0)