АҚШнинг Теннесси штатида 1994 йилда музлатилган эмбриондан соғлом чақалоқ туғилди. Бу ҳақда MIT Technology Review нашри хабар берди.
Чақалоқнинг биологик эмбриони 1990 йилларда Линда Арчерд исмли аёл томонидан ЭКО (сунъий уруғлантириш) орқали яратилган. Аёл ўша пайтда олти йил давомида ҳомиладор бўла олмаган. 1994 йил май ойида шифокорлар тўртта эмбрион яратишга муваффақ бўлган. Улардан бири Линда бачадонига кўчирилган, шундан сўнг аёл соғлом қиз фарзанд дунёга келтирган. Қолган учта эмбрион эса криоконсервация қилинган, яъни музлатилган ҳолда сақланган.
Линда Арчерд учун бу йилига 1000 долларга тушган. Дастлаб аёл уларни ўзи ишлатмоқчи бўлган, бироқ кейинчалик фикрини ўзгартириб, бошқа оилаларга топширишга қарор қилган. Ҳозирда Линда 62 ёшда. Аксарият клиникалар унинг эмбрионлари билан ишлашдан бош тортган, чунки улар эскирган технологиялар билан музлатилган бўлган.
Натижада Оҳаё штатида яшовчи Линдси ва Тим Пирс исмли эр-хотин ушбу эмбрионлардан бирини Опен Heartс дастури орқали “асраб олган”. Улар шу тариқа 2025 йил 26 июль куни ўғил фарзандли бўлган. У “энг кекса чақалоқ” деб эътироф этилган.
Пирслар 7 йил давомида табиий йўл билан фарзанд кўришга уринган, аммо муваффақиятга эриша олмаган.
Бизда оғир туғуруқ бўлди, лекин ҳозир ҳаммаси яхши. У жуда тинч, бебаҳо фарзандимиз борлигига ҳали ҳам ишона олмаяпмиз, дейди Линдси.
Линда Арчерд эса ҳозирча чақалоқ билан учрашмоқчи эмаслигини билдирган. Бироқ унинг дунёга келишини “ҳақиқатга айланган орзу” деб атаган.
Бу менинг ДНКимдан, бу менинг қизимнинг туғишган укаси, дея таъкидлаган у.
Изоҳ (0)