Саудия Арабистонининг Тоиф шаҳридаги Green Mountain Park боғида “360 даража” номли аттракцион одамлари билан бирга қулаб тушди. Бу ҳақда Khaleej Times нашри хабар берди.
Маълумотларга кўра, ҳодиса вақтида аттракционнинг марказий таянчи иккига бўлиниб кетган ва ундаги одамлар кучли зарба билан ерга қулаган. Камида 23 киши тан жароҳати олган, уларнинг айримлари оғир аҳволда. Ҳодисанинг аниқ санаси ошкор этилмаган, бироқ унга оид видео лавҳалар 31 июль куни ижтимоий тармоқларда тарқалган.
Фавқулодда хизматлар зудлик билан воқеа жойига етиб бориб, қутқарув ишларини бошлаган. Ҳодисанинг сабабларини аниқлаш бўйича тергов олиб борилмоқда.
Шунга ўхшаш воқеа 2025 йил апрель ойида Ҳиндистоннинг Деҳли шаҳрида ҳам юз берган эди. Ўшанда Капашера яқинидаги Fun Н Food сув боғида аттракцион қулаб тушган. Оқибатда 24 ёшли Приянка исмли аёл ҳалок бўлганди. У аттракционга бўлажак турмуш ўртоғи билан чиққан бўлган.
Изоҳ (0)